विराटनगर । मोरङस्थित बेलबारी नगरपालिकाद्वारा गठन गरिएको बेलबारी प्रज्ञा–प्रतिष्ठानले तिहार, न्हु दया, छठ र उँधौलीको अवसरमा कार्यकालको शुभारम्भसँगै पहिलो सार्वजनिक कार्यक्रमका रूपमा शुभकामना कार्यक्रम सम्पन्न गरेको छ ।
प्रतिष्ठानका प्रमुख संरक्षकसमेत रहनुभएका बेलबारी नगरपालिकाका प्रमुख दिलप्रसाद राईको प्रमुख आतिथ्यमा २०७९ कात्तिक ५ गते सो कार्यक्रम सम्पन्न भएको हो ।
साहित्यकार/सङ्गीतकर्मी मधु गुरुङ, नेकपा (एमाले) बेलबारी नगर अध्यक्ष ईरानराई, नेपाली काङ्ग्रेसका पूर्व नगर सभापति तथा नाट्यकर्मी शम्भु भट्टराई, नेकपा (माओवादी केन्द्र) का वरिष्ठ उपाध्यक्ष राम किराँती, जसपा बेलबारी नगर उपाध्यक्ष कमल गुरुङ तथा बेलबारी नगरका जनप्रतिनिधिको तर्फबाट वडाध्यक्ष योगेन्द्र सुवेदीले शुभकामना मन्तव्य राख्दै प्रतिष्ठानले नगरभित्रका सबै भाषा, साहित्य, कला, सङ्गीत तथा नाट्य विधाको विकास गर्नुपर्ने बताउनुभयो ।
कार्यक्रममा वडाध्यक्षहरू कृष्ण गुरुङ, डिल्लीबहादुर कटुवाल, विक्रम बान्तावा तथा नगरसभा सदस्यहरू रामकुमार घिमिरे र तारा सुन्दासलगायत विशिष्ट व्यक्तित्वको आतिथ्य रहेको थियो ।
सो अवसरमा गजलकार जेबी थुलुङले गजल वाचन गर्नुभएको थियो भने विवेश मोते, लक्ष्मी पौडेल तथा मौसम नेपालीले गीत गाउनुभएको थियो ।
कार्यक्रममा प्रज्ञा समितिकी अध्यक्ष रेखा सुवेदीको अध्यक्षता, सचिव कुलप्रसाद बरालको सञ्चालन, उपाध्यक्ष मनकुमार गुरुङको स्वागत मन्तव्य तथा उपाध्यक्ष अजितकुमार धिमालको धन्यवाद ज्ञापन रहेको थियो ।
उक्त कार्यक्रममा प्रज्ञा समितिका पदाधिकारी तथा सदस्यको परिचयसमेत गराइको थियो भने १०० भन्दा बढी स्रष्टा तथा कलाकारको उपस्थिति रहेको थियो ।
