काठमाडौँ । अक्सफोर्ड (आधारशिला) कलेजले तिहार, छठपर्व तथा नेपाल संवत् ११४३ को अवसरमा शुभकामना आदानप्रदान तथा चियापान कार्यक्रम सम्पन्न गरेको छ ।
कलेजको प्राङ्गण नयाँबजारमा २०७९ कात्तिक ५ गते बिहान उक्त कार्यक्रम सम्पन्न भएको हो ।
कार्यक्रमको अवसरमा नमूना प्रकाशन तथा अनुसन्धान प्रालिद्वारा प्रकाशित अर्धवार्षिक पत्रिका “टुकी” को पहिलो अङ्क प्रगतिशील लेखक सङ्घका अध्यक्ष डा. मधुसूदन गिरीले विमोचन गर्नुभएको थियो ।
कलेजका लेक्चरर समीर सिंहको सञ्चालनमा अघि बढेको कार्यक्रमको प्रारम्भ प्रगतिशील साहित्यकार डा. कौशिला रिसालद्वारा “मरुभूमिमा मिल्किएका जिन्दगी” शीर्षकको कविता वाचनबाट भएको थियो ।
सो अवसरमा पत्रकार सुखदेव दाहाल, दैलेखी सेवा समाजका भक्त विक, प्रगतिशील पत्रकार सङ्घ नेपालका सचिव प्रकाश थापामगर, अखिल नेपाल कानुन व्यवसायी सङ्घका महासचिव लक्ष्मणदेव पाण्डे, नीलगङ्गा बचत तथा ऋण सहकारी संस्थाका कृष्णहरि अर्याल, नमूना प्रकाशनका अध्यक्ष कृष्णहरि देवकोटा, अक्सफोर्ड कलेजका अध्यक्ष राजेन्द्र ढकाल, अभिभावकको तर्फबात कृष्णगोपाल बन्जारा, अखिल (क्रान्तिकारी) का सचिव बाबुराम नेपाली र आधारशिला कलेजका अध्यक्ष भोला ढकालले सङ्क्षिप्त मन्तव्य राख्नुभएको थियो ।
कार्यक्रममा कलेज तथा स्कुलका विद्यार्थी, पूर्वविद्यार्थी, शिक्षक–शिक्षिकाको तर्फबाट मन्तव्य, कविता, गीत, मुक्तक, देउडा गीत, नृत्य प्रस्तुत गरिएको थियो ।
