केरसिंह अदै, कपिलवस्तु ।
राष्ट्रिय जनमोर्चा कपिलवस्तुले निर्वाचन परिचालन समिति गठन गरेको छ । सोमबार वाणगंगामा सम्पन्न चुनावी भेलाले अगामी मंसिर ४ गते हुन गैरहेको प्रतिनिधि सभा र प्रदेश सभा निर्वाचन तयारीका लागि परिचालन समिति गठन गरेको हो ।
राजमो जिल्ला अध्यक्ष दधिराम आचार्यको अध्यक्षतमा सम्पन्न भेलालाई प्रमुख अतिथि राजमो केन्द्रीय सल्लाहकार तथा राष्ट्रिय सभा सदस्य राजेश विकले सम्बोधन गर्नुभएको थियो । उहाँले सम्बोधन गर्दै अहिलेको पाँचदलीय गठबन्धनको मूल उद्देश्य भनेको गणतन्त्रको रक्षा, धर्म निरपेक्षताको रक्षा, प्रतिगमनलाई रोक्नु रहेको बताउनु भयो ।
त्यस्तै, राजमो केन्द्रीय सल्लाहकार तथा लुम्बिनी प्रदेश उपाध्यक्ष बद्रे आलमले प्रतिगमनको कुरा राजमोले एक्लै उठाउँदै आएको र हाल ठूला दललाई पनि बुझाउन सफल भएको बताउनुभयो । नेता आलमले पार्टीको नीति निर्देशन पालन गरेर पाँचदलीय गठबन्धनका उम्मेदवारहरु र राष्ट्रिय जनमोर्चाका समानुपातिक उम्मेदवारहरुलाई विजय बनाउन सकृय रूपमा लाग्नु पर्ने बताउनु भयो ।
कार्यक्रममा अखिल नेपाल किसान महासंघका केन्द्रीय उपाध्यक्ष तथा भूमि आयोग कपिलवस्तुका अध्यक्ष शिव पौडेल, मूल प्रवाह अखिल भारत नेपाली एकता समाजका चिरञ्जीवी आचार्य, अखिल नेपाल महिला संघकी अम्बिका पौडेलले पनि मन्तव्य राख्नुभएको थियो ।
भेलाले दधिराम आचार्यको संयोजकत्वमा ७ सदस्यीय मूल प्रचार–प्रसार समिति गठन गरेको छ । सदस्यमा मुक्ति न्यौपाने, नरबहादुर घर्तिमगर, दिलबहादुर विक , केरसिंह अदै, विमला श्रेष्ठ र मिना पोख्रेल रहनु भएको छ ।
यसैगरी रामप्रसाद बेल्बासेको संयोजकत्वमा पाँच सदस्यीय आर्थिक परिचालन समिति गठन गरिएको छ । समितिको सदस्यहरुमा टेकपति सापकोटा, मित्रलाल भुसाल ,केरसिंह पुन, मानबहादुर नेपाली रहनु भएको छ । यसैगरी शसि सापकोटाको संयोजकत्वमा ६१ सदस्यीय प्रचार प्रसार समिति गठन गरिएको छ ।
भेलामा १५ जनाले नयाँ सदस्यता लिएका थिए । उहाँ हरुलाई प्रमुख अतिथि राजेश विक र वद्रे आलमले अबिर लगाई स्वागत गर्नु भएको थियो ।
भेलाले क्षेत्र–क्षेत्रमा भेला गर्ने निर्णय गरेको छ । कार्यक्रमको सञ्चालन राजमो उपाध्यक्ष राम प्रसाद बेल्बासे र स्वागत मन्तव्य मुक्ति न्यौपानेले गर्नुभएको थियो ।
