बेनी । नवौँ राष्ट्रिय खेलकुद प्रतियोगिताअन्तर्गत म्याग्दीको बेनीमा तेक्वान्दो खेल सुरु भएको छ ।
राष्ट्रिय खेलकुद परिषद्ले आयोजना गरेको प्रतियोगिता बेनीको कालीपुल कबर्डहलमा कात्तिक २ गतेसम्म सञ्चालन हुने छ । सातओटा प्रदेश, तीनओटा विभागीय र गैरआवासीय नेपाली सङ्घ (एनआरएनए) का तीन सय ३० जना खेलाडी सहभागी भएको जिल्ला खेलकुद विकास समितिले जनाएको छ ।
समितिका प्रशिक्षक कर्ण प्रधानले पुम्सेका छ र गेरोगीका १६ गरी २२ ओटा इभेन्ट्सका खेल हुने जानकारी दिनुभयो । स्वर्ण र कास्य २२/२२ तथा ४४ ओटा रजत पदकका लागि प्रतिस्पर्धा हुने छ । महिलातर्फ ४६ देखि ७२ र पुरुषतर्फ ५४ देखि ८७ केजी तौल समूहका खेलाडी सहभागी छन् ।
२०७९ असोज २८ गते शुक्रबार साँझ भएको उद्घाटन खेलमा पुम्से एकलको महिला र पुरुषतर्फ नेपाल पुलिस क्लबले जितेको राष्ट्रिय खेलकुद परिषद्का प्रमुख तेक्वान्दो प्रशिक्षक नविन श्रेष्ठले बताउनुभयो ।
महिलातर्फ ७.१९९ अङ्कसहित नेपाल प्रहरीकी निशा दर्नाल विजयी हुँदा उपविजेता भएकी नेपाली सेनाकी स्वतिका तामाङले ७.१४९ अङ्क जोडेकी थिइन् । तेस्रो स्थान प्राप्त गर्न सफल प्रदेश १ की सुशीला राईले ६.८६६ र गण्डकीकी अर्पणा अधिकारीले ६.४६६ अङ्क पाइन् ।
पुरुषतर्फ प्रहरीका कमल श्रेष्ठ ७.५३३ अङ्कसहित विजयी हुँदा लुम्बीनीका युवराज रानाले ७.१४९ अङ्कसहित उपविजेता बन्नुभयो । त्यस्तै, ६.८६६ अङ्कसहित गण्डकीका आयुष गुरुङ र ६.६९९ अङ्कसहित प्रदेश नं. १ का विवेक राई तेस्रो भए ।
पुम्से र गिरोगीतर्फका बाँकी खेल आज सञ्चालन हुने राखेपका प्रमुख प्रशिक्षक श्रेष्ठले बताउनुभयो । नवौँ राष्ट्रिय खेलकुद प्रतियोगिता अन्तरगत बेनीमा असोज २७ बिहिबारदेखि महिला भलिबल प्रतियोगिता सञ्चालन भएको छ ।
