बागलुङ । लोकतान्त्रिक वामगठबन्धन बागलुङ क्षेत्र नं.१ को निर्वाचन सम्पर्क कार्यलय बाग्लुङ बजारमा स्थापना गरिएको छ । सम्पर्क कार्यालयको उद्घाटन शुक्रबार गठबन्धन तर्फबाट बागलुङ १ का उम्मेदवार राष्ट्रिय जनमोर्चाका अध्यक्ष चित्र बहादुर केसीले गर्नुभयो ।
उद्घाटन पश्चात् ब्राउन आइजको सभाहलमा उम्मेदवार परिचय तथा कार्यकर्ता प्रशिक्षण सम्पन्न भएको छ । कार्यक्रममा साझा उम्मेदवार तथा अध्यक्ष केसीले सम्बोधन गर्दै प्रतिगमनको अन्त्य संविधानको रक्षा, राजनैतिक स्थायित्वका लागि लोकतान्त्रिक वामगठबन्धनका उम्मेदवारहरु बिजयी गराउन सबैमा अनुरोध गर्नु भएको थियो ।
कार्यक्रममा लोकतान्त्रिक वामगठबन्धन बागलुङ क्षेत्र नं.१ (क) का साझा उम्मेदवार नेपाली कांग्रेस बागलुङका पूर्वसभापति दिपेन्द्र बहादुर थापा, लोकतान्त्रिक वामगठबन्धन बागलुङ क्षेत्र नं१ (ख) का साझा उम्मेदवार नेपाली कांग्रेस नेता डिल्लीराम सुवेदी, नेकपा माओवादी केन्द्रका केन्द्रीय सदस्य बलावती शर्मा, नेपाली कांग्रेसका केन्द्रीय सदस्य चम्पादेवी खड्का, नेकपा समाजवादी बागलुङका अध्यक्ष लालबहादुर थापा र जनता समाजवादीका चित्र सापकोटा लगायतले सम्बोधन गर्नु भएको थियो ।
कार्यक्रम राष्ट्रिय जनमोर्चा बागलुङका सचिव भिमलाल पोखरेलको सञ्चालन, कांग्रेस बागलुङका कावा अध्यक्ष सागर छन्त्यालको अध्यक्षतामा सम्पन्न भएको थियो ।
