जनकपुरधाम । मधेश सरकारबाट कांग्रेसका मन्त्री पदमुक्त भएका छन् । मुख्यमन्त्री लालबाबु राउतले सरकारमा रहेका कांग्रेसका ३ जना मन्त्रीलाई पदमुक्त गरेका हुन् ।
बिहीबार प्रधानमन्त्री शेरबहादुर देउवाले केन्द्र सरकारमा रहेका जसपाका चार मन्त्रीलाई बर्खास्त गरेका थिए । त्यसैको बदलामा जसपा नेतृत्वको मधेश सरकारले कांग्रेसका मन्त्री हटाएको हो ।
कांग्रेसबाट सरकारमा सामेल भौतिक पूर्वाधार तथा विकासमन्त्री रामसरोज यादव, खानेपानी तथा उर्जा विकासमन्त्री ओमप्रकाश शर्मा र महिला बालबालिका युवा तथा खेलकुदमन्त्री वीरेन्द्र सिंहलाई पदमुक्त गरिएको छ ।
यसअघि बिहीबार साँझ मुख्यमन्त्री राउतले कांग्रेसी मन्त्रीहरुलाई फोन गरेर राजीनामा दिन भनेका थिए । उनीहरुले राजीनामा नदिएपछि मुख्यमन्त्री राउतले पदमुक्त गर्नका लागि प्रदेश प्रमुख समक्ष सिफारिस गरेका थिए ।
कांग्रेसबाट सरकारमा सामेल मन्त्रीहरुलाई पदमुक्त गरिएपनि सत्ता गठबन्धनकै माओवादी केन्द्र र नेकपा एकीकृत समाजवादी पार्टीका मन्त्रीहरुलाई भने मुख्यमन्त्री राउतले पदमुक्त गरेका छैनन् ।
