काठमाडौँ । बङ्गलादेशको आर्टशाला कला केन्द्रको आयोजनामा अन्तर्राष्ट्रिय कला प्रदर्शनी आयोजना गरिएको छ ।
तीन दिनअघि नेपाल आइपुगेको बङ्गलादेशी आर्टशाला केन्द्रको कलाकार समूहले गिरिजाप्रसाद कोइराला फाउन्डेसन, कला तथा संस्कृति विभागको सहकार्यमा २०७९ असोज ५ गते बुधबारदेखि ठमेलस्थित मिथिला येँ आर्ट ग्यालरीमा कला प्रदर्शन गरेको हो ।
प्रदर्शनीमा बङ्गलादेशका ५० कलाकारले कोरेका तस्बिर प्रदर्शनी गरिनुका साथै नेपाली वरिष्ठ कलाकार श्यामसुन्दर यादव र सिजन पोखरेलको कला प्रदर्शनीमा राखिएको छ । त्यस्तै, बेलायती कलाकार नौसिन फर्जाना र डेनमार्कका कलाकार सुसाना हेरेन्ससिनीमीको कलासमेत प्रदर्शनीमा राखिएको छ ।
होविगञ्ज चारुखोला एकेडेमीका निर्देशक एवम् आर्टशालाका सञ्चालक आशिष आचार्यले आर्टशालाले पहिलोपटक नेपालमा आएर अन्तर्राष्ट्रिय स्तरको कला प्रदर्शन गरेको जानकारी दिनुभयो । उहाँले कला प्रदर्शनीले नेपाल र बङ्गलादेशको सम्बन्ध झन् मजबुत बनाएको बताउनुभयो । संस्कृति र प्रकृतिले सुन्दर नेपालमा कला प्रदर्शन गर्नु बङ्गलादेशी कलाकारका लागि खुसीको कुरा भएको उहाँको भनाइ छ ।
जिपी कोइराला फाउन्डेशन, कला तथा संस्कृति विभागका प्रमुख एवम् मिथिला येँ आर्ट ग्यालरीका श्यामसुन्दर यादवले फाउन्डेसनले संसारभरका कलाकारलाई जोड्ने काम गर्दै आएको बताउनुभयो । विगत १७ वर्षदेखि सञ्चालनमा रहेको मिथिला येँ आर्ट ग्यालरीमा हालसम्म तीन सयभन्दा बढी स्वदेशी तथा विदेशी कला प्रदर्शन गरिसकिएको छ । कला प्रदर्शनी असोज ७ गतेसम्म चल्ने छ । (रासस)
