काठमाडौं । ‘नेपाल भ्रमण वर्ष २०२०’ को उद्घाटनको तयारी पुरा भएको छ । संस्कृति, पर्यटन तथा नागरिक उड्यन मन्त्रालयले सोमबार पत्रकार सम्मेलन गरी उद्घाटनको तयारी पुरा भएको जानकारी दिएको छ ।
राष्ट्रपति विद्यादेवी भण्डारीबाट यही जनवरी १ (पुस १६ गते) भ्रमण वर्षको भव्य उद्घाटन हुँदैछ । प्रधानमन्त्री केपी शर्मा ओलीले विशिष्ट अतिथिको रुपमा मन्तव्य दिने संस्कृति पर्यटन तथा नागरिक उड्डयन मन्त्री योगेश कुमार भट्टराईले जानकारी दिएका छन्। त्रिपुरेश्वरस्थित दशरथ रंगशालामा हुने उद्घाटन समारोहमा चीन, भारत, जमैका, म्यान्मार लगायत देशका पर्यटनमन्त्रीहरु सहभागी हुनेछन् भने १८ देशका ३५ भन्दा बढी पत्रकारको सहभागिता रहनेछ ।
भ्रमण वर्ष राष्ट्रिय कार्यक्रम संयोजक सुरज वैद्यले उद्घाटन समारोहमा सामाजिक संघ सस्था, नेपाल प्रहरी, शसस्त्र प्रहरी, नेपाली सेना लगायतले मार्च पास गर्ने जानकारी दिए । उनले समुद्घाटननको सम्पूर्ण तयारी पुरा भएको भन्दै जनवरी १ अर्थात पुस १६ गते दिउँसो ४ बजे बाट औपचारिक कार्यक्रम शुरु हुने बताएका छन् ।
संयोजक वैद्यले दशरथ रंगशालामा उपस्थित हुने सबैलाई पासको व्यवस्था गरेको भन्दै सर्वसाधरण तथा आगन्तुकलाई ३ देखी ३ः४५ सम्म भित्र गईसक्नुपर्ने बताएका छन् । भीभीआईपी भने ४ बजे उपस्थिती हुने उनले जानकारी दिएका छन्। त्यसपछि ७ बजेसम्म कार्यक्रम हुने तालिका रहेको छ। कार्यक्रममा नेपाली सांस्कृतिक झाँकी सहित राष्ट्रिय कलाकार मार्फत सांगितिक कार्यक्रम समेत रहेको छ ।
त्यस्तै, विदेशस्थित नेपाली कूटनीतिक नियोगमा समेत जनवरी ७ मा भ्रमण वर्षको उद्घाटन कार्यक्रम राखिएको छ । यसबाहेक बुधबार काठमाडौंसहित सबै प्रदेशमा समेत भ्रमण वर्ष उदघाटन हुने छ ।
