काठमाडौं । सत्तारुढ दल नेपाल कम्युनिष्ट पार्टी (नेकपा) का नेताहरुले पार्टीकाे निर्णय अवज्ञा गर्ने चेतावी दिएका छन् । प्रदेश ३ काे नाम तथा राजधानीबारे असन्तुष्ट प्रदेश सभा सदस्यहरुले पार्टीकाे ह्विप नमान्ने चेतावनी दिएका हुन् ।

नेकपाको सचिवालय बैठकले प्रदेश नम्बर ३ को नाम र केन्द्र टुंगो लगाएको छ । आइतबार बसेको सचिवालय बैठकले  प्रदेश ३ को नाम बागमती र राजधानी हेटौँडा राख्न निर्देशन दिने निर्णय गरेको हो ।

तर, सचिवालयको निर्णयप्रति नेताहरु असन्तुष्ट बनेका हुन् । उनीहरुले प्रदेश सभामा पार्टी निर्णय अवज्ञा गर्ने र त्यसलाई असफल बनाइदिने चेतावनी दिएका हुन् । संविधानको मर्मलाई आत्मसात नगरी पार्टीले प्रदेशको नामाकरण र स्थायी राजधानीका विषयमा हस्तक्षेप गर्न खोजेकाे भन्दै सांसदहरुले आपत्ति जनाएका हुन् ।

धादिङ १ ‘क’ का सांसद राजेन्द्र पाण्डेले सबैतिर पार्टीले हस्तक्षेप गर्न खोजेकोमा आपत्ति जनाए । उनले प्रदेशको नाम र स्थायी राजधानी तोक्ने अधिकार प्रदेशसभाका सांसदलाई छ भन्दै यसमा केन्द्रको टाउको दुख्नुपर्ने कारण नभएको बताए । उनले प्रदेशसभाबाटै यसबारे टुंगो लगाउने बताएका छन् ।

यस्तै, बहुमत सांसद पार्टीको यो निर्देशनको विपक्षमा रहेका र प्रदेश सभाको मतदानबाट यसको टुंगो लगाउने काभ्रे क्षेत्र नं १ ‘ख’ का सांसद चन्द्र तामाङले बताएका छन् । यसैगरी दोलखाका सांसद विशाल खड्काले प्रदेशका बारेमा पार्टी सचिवालयले दिएको निर्देशन कार्यान्वयन नगर्ने चेतावनी दिँदै प्रदेश सभामा आफ्नो विवेक प्रयोग गर्ने बताए ।

यता, मुख्यमन्त्री डोरमणी पौडेलले भने पार्टीको निर्देशन अनुसार नै प्रदेशको नाम र राजधानी टूगो लगाउने बताएका छन् । प्रदेश ३ मा नेकपाकै सरकार छ । प्रदेश सभामा १ सय १० सांसद छन्। जसमध्ये नेकपाको मात्रै ८० सिट छ भने कांग्रेसको २२ र अन्य विभिन्न दलको ८ सिट छ । प्रदेशसभामा नेकपाको एकल दुईतिहाई सिट रहेको छ ।

२०७४ साल माघ ३ गते तत्कालीन प्रधानमन्त्री शेरबहादुर देउवा नेतृत्वको सरकारले प्रदेशको अस्थायी मुकाम हेटौँडामा तोकेको थियो । तर, हेटौँडा अपायक भन्दै सांसदहरुले तत्काल सार्न माग गरेका थिए । यसअघि कर्णाली, गण्डकी र सुदूरपश्चिम प्रदेशले भने प्रदेशसभाबाटै सर्वसहमतिले प्रदेशको नाम तोकिसकेका छन् भने प्रदेश १, २, ३ र ५ ले भने स्थायी नाम र राजधानी तोक्न सकेका छैनन् ।