काठमाडौं । रक्तिम सांस्कृतिक अभियानले आगामी असोज १० देखि १४ गतेसम्म बुटवलमा केन्द्रीय प्रशिक्षक प्रशिक्षण शिविरको आयोजना गर्ने भएको छ ।
हालै बुटवलमा सम्पन्न केन्द्रीय समितिको बैठकले प्रशिक्षण शिविर आयोजना गर्ने निर्णय गरेको महासचिव जीवन शाहीले जानकारी दिनुभयो ।
अध्यक्ष गिरी प्रसाद बुढाको अध्यक्षतामा बुटवलमा बसेको बैठकले विभिन्न सांगठनिक कामको जिम्मेवारीसमेत बाँडफाँट गरेको छ।
महासचिव शाहीका अनुसार अभियानको संगठनात्मक गतिविधि अगाडि बढाउनका लागि विभिन्न प्रदेश र जिल्ला इन्चार्ज तोक्नुका साथै जिल्ला भेलाको मितिसमेत तय गरिएको छ ।
जसअनुसा सुदूरपश्चिम प्रदेशमा बावुराम आचार्य, कर्णाली प्रदेशमा जीवन शाही, लुम्बीनीमा गिरी प्रसाद बुढा, गण्डकी र बागमतीमा हेमराज आश्रम तथा मधेश र प्रदेश १ मा मोहराज चालिसेलाई इन्चार्जको जिम्मेवारी दिइएको छ ।
बैठकले डोटी, कैलाली, कञ्चनपुर, सुर्खेत, दाङ, बाँके, अर्घाखाँची, गुल्मी पाल्पा, कपिलवस्तु, बाग्लुङ, चितवन जिल्लामा असोज १५ गतेभित्र जिल्ला भेला गर्ने निर्णय पनि गरेको छ ।
यसैगरी यस वर्षको द्यौसी भैलो कार्यक्रम केन्द्रीय समितिको तर्फबाट काठमाडौंमा खेल्ने र जिल्लाहरुमा पनि भैलो खेल्ने रक्तिमले जनाएको छ ।
रक्तिमले दिवंगत वरिष्ठ गायिका लक्ष्मी गुरुङको स्मृतिमा आगामी कार्तिक २५ गते ‘लक्ष्मी स्मृति दिवस’ मनाउने जानकारी दिएको छ ।
