काठमाडौं । विभिन्न मिति तथा समयमा चोरी भएका २१ वटा सवारी साधन ट्राफिक प्रहरीले खोजी गरी सम्बन्धित धनीलाई हस्तान्तरण गरेको छ । बिहीबार काठमाडौं उपत्यका ट्राफिक प्रहरी कार्यालयमा एक कार्यक्रका बीच सवारी साधन धनीलाई हस्तान्तरण गरिएको हो ।
काठमाडौं उपत्यका ट्राफिक प्रहरी कार्यालय रामशाहपथमा आयोजित कार्यक्रममा उपत्यका ट्राफिक प्रहरी कार्यालयका प्रवक्ता प्रहरी वरिष्ठ उपरीक्षक राजेन्द्र प्रसाद भट्टले धनीलाई सवारी साधन हस्तान्तरण गर्नुभयो ।
काठमाडौं उपत्यका ट्राफिक प्रहरी कार्यालयमा आर्थिक वर्ष २०७९।०८० को श्रावण महिना र भदौ महिनाको मध्य सम्ममा दुई पांग्रे सवारी साधन हराएको २२१ वटा निवेदन प्राप्त भएका थिए । प्राप्त निवेदनको आधारमा चोरी भएका सवारी साधन खोजी गर्दा श्रावण र भदौ महिनाको मध्य सम्म १०१ वटा सवारी साधन फेला परेका थिए ।
फेला परेका मध्ये श्रावण महिनामा ७३ वटा र भदौ महिनाको मध्यसम्म १० वटा सवारी साधन धनीलाई जिम्मा लगाइसकिएको ट्राफिक प्रहरीले जनाएको छ ।
यस्तै, आज पनि २१ वटा सवारी साधन सम्बन्धित धनीलाई हस्तान्तरण गरेसँगै यसै आर्थिक वर्षको भदौ १६ गतेसम्म १०४ ओटा सवारी साधनलाई धनीको जिम्मा लगाइएको छ ।
यसै आर्थिक वर्षमा चोरीका ८ वटा दुई पांग्रे सवारी साधन सहित ९ जना मानिसलाई भने आवश्यक कारबाहीको लागि परिसर तथा वृतमा पठाइएको छ। फेला परेका मध्ये धनी सम्पर्कमा नआएका ३ वटा सवारी साधन काठमाडौं उपत्यका ट्राफिक प्रहरी कार्यालय परिसरमै रहेकाले दुई पाङ्ग्रे सवारी साधन हराएको निवेदन दिएका धनीलाई सम्पर्कमा आउन उपत्यका ट्राफिक प्रहरी कार्यालयले अनुरोध गरेको छ।
