काठमाडौं । इराकमा तैनाथ नेपाली शान्ति सैनिकको अदलीबदली भएको छ । सेनानी बसन्त नाथ योगीको नेतृत्वमा १८ जना नेपाली शान्ति सैनिकहरु कमर्सियल फ्लाइट (फ्लाइ दुबई) मार्फत काठमाडौंबाट मिशन ईलाकातर्फ प्रस्थान गरेको नेपाली सेनाले जनाएको छ ।
युनाइटेड नेसन्स एसिस्टेन्स मिसन फर इराक (युनामी), इराकमा तैनाथ संयुक्त राष्ट्र संघीय गार्ड युनिट युनामी एक्स (बी)लाई बदली गर्नका लागि संयुक्त राष्ट्र संघीय गार्ड युनिट युनामी ९ (बी) को पहिलो टोली खटिएको हो ।
साथै, उक्त मिशनमा तैनाथ संयुक्त राष्ट्र संघीय गार्ड युनिट युनामी–१० (बी)को पहिलो टोली सह सेनानी अनिल थापाको नेतृत्वमा १८ जना नेपाली शान्ति सैनिकहरु आज स्वदेश फिर्ता भएका छन् ।
संयुक्त राष्ट्रसंघको आव्हानमा शान्ति स्थापना कार्यको लागि नेपाली सेना विगत लामो समयदेखि संसारका विभिन्न मुलुकहरुमा कार्यरत रही शान्ति स्थापना कार्यमा महत्वपूर्ण योगदान पुर्याउँदै आइरहेको छ ।
