काठमाडौं । सत्ता गठबन्धनका चार दलले प्रतिनिधि सभा सिटमा गरेको दाबी फिर्ता लिन तयार भएका छन् ।
शुक्रबार बसेको सिट बाँडफाँट कार्यदलको बैठकमा चारै दलले आ–आफ्नो दाबी फिर्ता लिएर आ–आफ्नो पार्टीभित्र छलफल गर्ने समझदारी बनाएका हुन् ।
बिहीबार बसेको कार्यदलको बैठकमा कांग्रेसले एक सय, माओवादी केन्द्रले ६०, नेकपा एकीकृत समाजवादीले ४०, जनता समाजवादी पार्टी (जसपा) ले ३५ र राष्ट्रिय जनमोर्चाले २ सिट दाबी गरेका थिए ।
कार्यदलका सदस्य राजमो नेता शर्माले चारै दल ३० प्रतिशत बढी दाबी छोडेर पार्टीभित्र छलफल गर्ने समझदारी भएको जानकारी दिनुभयो ।
‘हिजो (शुक्रबार) को बैठकमा सबै दलले आ–आफ्नो दाबी प्रस्तुत गरेका थिए । धेरै जसो सिटमा कुरा मिलेपनि केही सिटमा मात्रै कुरा मिलेको थिएन’ शर्माले भन्नुभयो, ‘उहाँहरु चारै दलका प्रतिनिधिले हिजो गरेको ३० प्रतिशत दाबी छोड्न तयार हुनुभएको छ । अब पर्सी बस्ने बैठकमा प्रतिनिधि सभा र प्रदेश सभाको समेत व्यवहारिक ढंगले छलफल गरेर टुंग्याउने सहमति भएको छ ।’
नेता शर्माका अनुसार राष्ट्रिय जनमोर्चाले भने आफ्नो बटमलाइनलाई स्पष्टसँग राखेको छ ।
बिहीबारको बैठकमा पनि राजमो प्रतिनिधिले आफूहरु अव्यवहारिक माग नराख्ने भन्दै प्रतिनिधिसभामा कम्तिमा दुई सिट प्युठान र बागलुङ १ सहित प्रदेशसभाका ६ सिटमा आफ्नो दाबी रहने स्पष्ट पारेका थिए ।
नेता शर्माले भन्नुभयो, ‘हामीले आफ्नो बटमलाइन स्पष्ट गरेका छौँ । छोड्नुपर्नेगरी दाबी गरेका छैनौँ । त्यही कुरा आजको बैठकमा पनि भयो । राजमोले राखेको अडानमा सबै दल सकारात्मक देखिन्छन् ।’
प्रतिनिधि सभा र प्रदेश सभामा फरक दल
कार्यदलले संघीय संसद र प्रदेश सभामा उम्मेदवारी दिँदा फरक–फरक दल गर्ने सहमति पनि जुटेको छ । शुक्रबार बसेको कार्यदल बैठकले एउटा मात्रै दलबाट संघ र प्रदेश सभामा उम्मेदवार बन्न नपाउने समझदारी बनाएको सञ्चारमन्त्री समेत रहेका कार्यदल सदस्य ज्ञानेन्द्रबहादुर कार्कीले बताउनुभयो ।
गठबन्धनमा तालमेल गरेर निर्वाचनमा जाने सहमति भइसकेकाले यसरी बाँडफाँट गर्दा समस्या नहुने उहाँको भनाई थियो ।
‘हामीले आजदेखि प्रदेशसभा क्षेत्रबारे छलफल थालेका छौँ। सामान्यतः संघीय क्षेत्रमा एउटा दलको उम्मेदवार भए प्रदेशमा अर्को दलबाट उम्मेदवार हुने गरी तालमेल गर्ने समझदारी भएको छ’, उहाँले भन्नुभयो ।
