काठमाडौं । गायक रामकृष्ण ढकाल र पत्नी निलम शाहबीच सम्वन्धविच्छेदको खबर सार्वजनिक भएलगत्तै ढकालले सामाजिक सञ्जालमा लेखेका छन्– ‘अरुले जेसुकै भनुन्, तर हाम्रो सम्बन्ध कहिल्यै मर्दैन ।’
ढकालको यो लेखले सबैलाई आश्चर्य चकित पारेको छ । पति पत्नीबीच कुनै खटपट नसुनिएका ढकाल दम्पतीले सम्बन्ध विच्छेद गरेको खबरले आश्चर्य चकित भएका सामाजिक सञ्जाल प्रयोगकर्ता उनले ‘लभ रियाक्ट’ सहित लेखेको स्ट्याटसले फेरि आश्चर्यमा परेका छन् । रामकृष्णले श्रीमतीसँगको फोटो हालेर ‘लभ रियाक्ट’ सहित लेखेका छन्, ‘अरुले जेसुकै भनुन्, तर हाम्रो सम्बन्ध कहिल्यै मर्दैन ।’
ढकाल दम्पती कानुनी रुपमा सम्बन्ध विच्छेद गरेपनि वास्तविक रुपमा उनीहरुबीच सम्बन्ध विच्छेद नभएको कतियपयको बुझाई छ । अहिले ढकाल दम्पती ऋणमा चुर्लुम्म डुबेको छ । आफ्नी पत्नीलाई कानुनी झन्झटबाट छुटकारा दिन र पत्नीको सम्पती सुरक्षित गर्न ढकालले सम्बन्ध विच्छेदको उपाय अपनाएको कतिपयले चर्चा गर्न थालेका छन् ।
बुधबार दिउँसो ढकाल र पत्नी निलमबीच सम्बन्ध–बिच्छेद भएको अदालतले पुष्टि गरेको छ । मुद्दा दर्ता गरेको भोलिपल्टै बुधबार काठमाडौ जिल्ला अदालतमा उनीहरुको सम्बन्ध विच्छेद भएको हो।
न्यायाधीश विदुर कोइरालाको इजलासले सम्बन्ध विच्छेदको निर्णय सुनाएको जिल्ला अदालतका श्रेष्तेदार आनन्द श्रेष्ठले जानकारी दिए । उनका अनुसार श्रीमतीले अंश नलिने, छोरी आमाको जिम्मामा रहने र बाबुलाई बेलाबेलामा भेटन दिने शर्तमा सम्बन्ध विच्छेद भएको हो ।
