काठमाडौँ । मानववादी विश्वदर्शनका प्रवर्तक जयपृथ्वीबहादुर सिंहको एक सय छयालियौँ जन्मजयन्ती मनाइएको छ ।
नेपाल बालसाहित्य समाजको आयोजना एवम् मानववादी समाज नेपाल (सोच नेपाल) र ह्युमजिन्म एन्ड जयपृथ्वी फाउन्डेसनको संयुक्त सहआयोजनामा २०७९ भदौ ७ गते सो दिवस मनाइएको हो ।
कार्यक्रममा बालसाहित्यका वरिष्ठ सर्जकहरू शान्तदास मानन्धर र भिक्टर प्रधानलाई नेबासास–जयपृथ्वी सम्मान प्रदान गरिएको थियो भने दुई बालिका बालसाहित्यतर्फको नेबासास–जयपृथ्वी बालप्रतिभा पुरस्कार र दुई बालिका कलातर्फको नेबासास–जयपृथ्वी बालप्रतिभा पुरस्कारबाट पुरस्कृत भएका थिए ।
कार्यक्रमममा मानववादी अभियानका अभियन्तासमेत रहेका बालसाहित्यकार रामदेव पाण्डेले अवधारणा पत्र प्रस्तुत गरेका थिए । “राष्ट्रिय विभूति जयपृथ्वीबहादुर सिंह र वर्तमान विश्व परिवेशमा विश्व आस्था मैत्री सङ्घको महत्त्व” विषयक अवधारणापत्रमाथि विभिन्न व्यक्तिले टिप्पणी गरेका थिए ।
यसै कार्यक्रममा ह्युमनिज्म एन्ड जयपृथ्वी फाउन्डेसनका अध्यक्ष मिनबहादुर सिंहले सङ्कलन गरेको सामग्रीलाई रामदेव पाण्डेले सम्पादन गरी प्रकाशित जयपृथ्वीबहादुर सिंहको जीवनी पुस्तकको लोकार्पण गरिएको थियो ।
अन्तर्राष्ट्रिय मानववादी सङ्गठनका अन्तर्राष्ट्रिय सदस्य एवम् सोच नेपालका संस्थापक उत्तम निरौलाले पुस्तकमाथि समीक्षा गरेका थिए ।
नेपाल बालसाहित्य समाजका उपाध्यक्ष बालसाहित्यकार प्रमोद प्रधानको सञ्चालनमा अध्यक्ष प्रा.डा. ध्रुव घिमिरेले अध्यक्षता गरेको कार्यव्रmमका प्रमुख अतिथि नेपाल प्रज्ञा–प्रतिष्ठानका उपकुलपति जगमान गुरुङ रहेका थिए । अतिथिलाई नेबासास कार्यसमिति सदस्य मञ्जु ज्ञवालीले स्वागत गरेकी थिइन् ।
प्रज्ञा–प्रतिष्ठानको बेग्लै कार्यक्रम
त्यसैगरी नेपाल प्रज्ञा–प्रतिष्ठानको दर्शन विभागले पनि एक कार्यव्रmम गरी जयपृथ्वी जयन्ती मनाएको छ । विभागका प्रमुख प्रा.डा. जगत् उपाध्यायको अध्यक्षतामा सम्पन्न अन्तरक्रियात्मक कार्यक्रमममा दर्शन शास्त्रका अध्येता प्रेमबहादुर धामीले कार्यपत्र प्रस्तुत गरेका थिए । “जयपृथ्वीबहादुर सिंह र मानववाद” विषयक कार्यपत्रमाथि विभिन्न विद्वानहरूले टिप्पणी गरेका थिए । यसरी नै जयपृथ्वीको जन्म जिल्ला बझाङमा पनि विभिन्न कार्यव्रmमका साथ जयपृथ्वी जयन्ती मनाइएको छ ।
नेपाल प्रज्ञा प्रतिष्ठान कमलादीमा सम्पन्न कार्यव्रmममा मानववादी दर्शनका जानकार, अभियन्ता, साहित्य तथा बालसाहित्य सर्जकहरूको बाक्लो उपस्थिति रहेको थियो ।
बझाङी राजा जयपृथ्वीबहादुर सिंह विश्वविख्यात नेपाली सपुत हुन् । २०७९ असारमा नेपाल सरकारले उनलाई राष्ट्रिय विभूति घोषणा गरेको थियो ।
जयपृथ्वी नेपाली पाठ्यपुस्तक, बालसाहित्य आदिका प्रथम लेखकसमेत हुन् । उनी सत्यवादी पाठशालाका संस्थापक तथा गोरखापत्रका प्रथम व्यवस्थापकसमेत रहेका थिए ।
