काठमाडौं । त्रिभुवन अन्तर्राष्ट्रिय विमानस्थलबाट पौने किलो सुनसहित एक भारतीय पक्राउ परेका छन्। पक्राउ पर्ने भारतको पश्चिम विहार, दिल्ली घर भएका ३४ वर्षीय विकास महाजन हुन् ।
यही भदौ ६ गते दिउँसो सारजाह एभिएसन सर्भिसको जी९५३६ नंम्बरको फ्लाइटमा दुवई हुँदै त्रिभुवन अन्तर्राष्ट्रिय विमानस्थलबाट सो सुन ल्याएका थिए ।
महाजन समेतका व्यक्तिहरूले भन्सार छली गरी अवैध रूपमा सुन ल्याई कारोबार गर्न लागेको भन्ने गोप्य सूचनाको आधारमा काठमाडौं उपत्यका अपराध अनुसन्धान कार्यालयबाट खटिएको विशेष अनुसन्धान टोलीले सिनामंगल गोल्डेन गेट नजिक रहेको ट्याक्सी पार्किङबाट महाजनलाई शंकास्पद अवस्थामा फेला पारी खानतलासी गरेको थियो ।
सो क्रममा उनले लगाएको सेण्डो भेष्टमा सुन जस्तो पहेलो पेष्ट गरेको धातु सहित तौल गर्दा ४०८ ग्राम र निलो रंगको अण्डरवेयरमा सुन जस्तो पहेलो देखिने कपडामा पेष्ट गरेको धातु सहित तौल गर्दा ३६९ ग्राम गरी जम्मा ७७७ ग्राम तौल रहेको धातु फेला परेको थियो।
यस्तै, ५०० दरको भारतीय रूपैयाँ १९ हजार ५०० एवम् ४२० यूएई दिराम सहित निजलाई प्रहरीले नियन्त्रणमा लिएको हो।
उनलाई भन्सार छली सम्बन्धी कसुरमा थप अनुसन्धान तथा कारबाहीको लागि दशिका सामानसहित विमानस्थल भन्सार कार्यालय गौचर पठाइएको प्रहरीले जनाएको छ।
