काठमाडौँ । अखिल नेपाल प्रगतिशील लेखक सङ्घ (अन्पा) को राष्ट्रिय भेला सम्पन्न भएको छ ।

केन्द्रीय समितिमा थपघट तथा घोषणापत्र र विधान पारित गर्दै २०७९ भदौ ४ गते भर्चुअल माध्यमबाट उक्त भेला सम्पन्न भएको हो ।

नेकपा (मसाल) का प्रवक्ता तथा प्रगतिवादी साहित्यकार रामप्रकाश पुरीको प्रमुख आतिथ्य तथा उद्घाटनका साथै सम्पन्न उक्त कार्यक्रमको प्रारम्भमा घोषणापत्र र विधानको मस्यौदामाथि छलफल चलेको थियो । घोषणापत्रको मस्यौदा अध्यक्ष समीर सिंहले र मस्यौदा विधान महासचिव प्रकाश थापामगरले प्रस्तुत गर्नुभएपछि प्राप्त सुझाव समेट्दै दुवै दस्तावेज पारित भएको थियो ।

त्यसपछि भेलामा केन्द्रीय समितिको थपघटसहितको प्यानल प्रमुख अतिथि रामप्रकाश पुरीले प्रस्तुत गर्नुभएको थियो । भेलाद्वारा पारित केन्द्रीय समितिमा अध्यक्ष समीर सिंह, उपाध्यक्ष रामदेव पाण्डे, महासचिव प्रकाश थापामगर, सचिव प्रदीप प्रधान र कोषाध्यक्ष बाबुराम आचार्य रहनुभएको छ ।

त्यस्तै, सचिवालय सदस्यमा गिरीप्रसाद बुढा र कमल कार्की तथा पूर्ण सदस्यहरूमा दिनेश थापा, राम गैरै पाल्पाली, तारामणि न्यौपाने, वैरागी जेठा, ऋतु केसी, कल्पना पौडेल जिज्ञासु, जीवनारायण पौडेल, ताराप्रसाद शर्मा, खगेन्द्रा विष्ट, गुरु कुमाल बुलबुल, भीष्म शाही, मेर्जन शाही, धनप्रसाद पुन, प्रेम गायक र मनिराम खनाल रहनुभएको छ ।

भेलाले सल्लाहकारमा रामप्रकाश पुरी, मनोज भट्ट, राजेश विश्वकर्मा र रेम रानालाई चयन गरेको छ ।

लेखनमा ठुलो शक्ति : पुरी
भेलामा प्रमुख अतिथिको आसनबाट मन्तव्य राख्दै नेकपा (मसाल) का प्रवक्ता तथा रामप्रकाश पुरीले प्रगतिशील लेखनमा ठुलो शक्ति भएको बताउनुभयो ।

‘जब युरोप अन्धकार अवस्थामा थियो’ उहाँले अगाडि भन्नुभयो– ‘दातेको साहित्यले ठुलो शक्ति सिर्जना गर्यो । यसबाट पुष्टि हुन्छ, प्रगतिशील लेखनमा ठुलो शक्ति हुन्छ ।’

उहाँले प्रगतिशील लेखकहरूले बौद्धिक विलास गर्न नहुने बताउनुभयो । ‘हामीले समाज परिवर्तनलाई केन्द्रमा राखेर लेखन प्रक्रिया अगाडि बढाउनुपर्दछ’ उहाँले भन्नुभयो ।

देशमा प्रतिगमनको खतरा अझै पनि यथावत रहेको बताउँदै उहाँले अहिले राष्ट्रियतामाथि पनि खतरा रहेको बताउनुभयो । उहाँले भन्नुभयो– ‘नेपालमा प्रगतिशील लेखकहरूले गणतन्त्र र राष्ट्रियताको विषयलाई प्राथमिकताका साथ लेखनीमा उतार्नुपर्दछ ।’

त्यस्तै, सम्बोधनको क्रममा उहाँले प्रगतिशीलले विचारका साथै शिल्पकलातर्फ ध्यान दिनुपर्ने बताउनुभयो । ‘प्रगतिशीलहरूले नारा होइन, शिल्पकलाका साथ लेखनी अगाडि बढाउनुपर्दछ ।’

भेलालाई मूल प्रवाह अखिल भारत नेपाली एकता समाजका केन्द्रीय सचिव त्रिभुवन भट्टराई र अखिल नेपाल महिला सङ्घकी केन्द्रीय कोषाध्यक्ष ऋतु केसीले शुभकामना दिनुभएको थियो ।

अन्पाका अध्यक्ष समीर सिंहको अध्यक्षता तथा महासचिव प्रकाश थापामगरको सञ्चालनमा अघि बढेको भेलामा उपस्थित सहभागीलाई खिमराज चालिसेले स्वागत गर्नुभएको थियो ।