काठमाडौँ । नेपाल विद्यालय कर्मचारी परिषद् दोस्रो चरणको आन्दोलनतर्फ अघि बढेको छ ।
२०७९ भदौ ४ गते पहिलो चरणको कार्यक्रम समाप्त हुँदासम्म पनि सरकारले आफ्ना मागलाई बेवास्ता गरेको भन्दै उनीहरूले दोस्रो चरणको आन्दोलन घोषणा गर्न लागेका हुन् ।
परिषद्का केन्द्रीय सदस्य तथा प्युठान जिल्ला अध्यक्ष प्रेम जिसीका अनुसार भदौ ४ गते नै राष्ट्रिय समिति, प्रदेश र जिल्ला अध्यक्ष सम्मिलित विस्तारित बैठकले दोस्रो चरणको कार्यक्रम घोषणा गर्ने छ ।
सो सङ्गठनले गत साउन २२ गते राष्ट्रिय समितिको निर्णयानुसार भदौ १ देखि ४ गतेसम्म “काठमाडौँ जाऔँ” अभियान सञ्चालन गरेको थियो । त्यस क्रममा भदौ १ गते सानोठिमी भक्तपुरस्थित शिक्षा तथा मानव श्रोत केन्द्रमा धर्ना दिइएको थियो । भदौ २ गते सोही कार्यालयमा तालाबन्दी गरिएको थियो ।
भदौ ३ र ४ गते भने माइतीघर मण्डलामा धर्ना तथा कोणसभा सम्पन्न गरिएको थियो । सो कार्यक्रममा नेपाल शिक्षक महासङ्घमा आबद्ध थुप्रै शिक्षक सङ्गठनले ऐक्यबद्धता प्रकट गरेका थिए ।
कर्मचारी परिषद्ले विद्यालय कर्मचारी सहायक (लेखापाल) को तलब हाल १३,५०० रहेकोमा त्यसलाई बढाएर ३६,५०० रुपियाँ कायम गर्नुपर्ने, त्यसैगरी विद्यालय सहयोगीको तलब हाल ८,००० रहेकोमा त्यसबलाई बढाएर २६,२१० कायम गरिनुपर्ने माग राखेको छ ।
एवम् प्रकार सो सङ्गठनले सामुदायिक विद्यालयमा कार्यरत विद्यालय कर्मचारीलाई दरबन्दीमा सामेल गरी एकपटकका लागि स्वतः स्थायी गरिनुपर्ने, सङ्घीय शिक्षा ऐन जारी हुँदाको बखत सेवारत विद्यालय कर्मचारीलाई एकपटकका लागि हदबन्दी लाग्न नहुने, ६० वर्ष उमेर पुगेका विद्यालय कर्मचारीलाई शिक्षकसरहको सेवासुविधा उपलब्ध गराई सःसम्मान अवकाश दिनुपर्ने, विद्यालय कर्मचारीलाई अध्ययन विदा र सन्तति वृत्ति आदिको प्रबन्ध गरिनुपर्ने तथा सरकारसित हालसम्म भएका सम्झौता तथा सर्वोच्चको आदेश कार्यान्वयन गर्नुपर्ने माग राखिएको छ ।
