काठमाडौं । नृत्य निर्देशक संघ नेपालको स्थापना दिवसको अवसरमा उपत्यकाका दुई सय विद्यालयहरुबीच नृत्य प्रतियोगिता सम्पन्न भएको छ ।
प्रतियोगितामा जोरपाटीस्थित दक्षिण ढोकामा रहेको आकाशदीप स्कुल प्रथम भएको छ भने फेरिल्याण्ड इन्टरनेशनल स्कुल दोस्रो र जेसेफ हाइस्कुल तेस्रो भएका छन् ।
सो अन्तर विद्यालयस्तरीय सामूहिक नृत्य प्रतियोगितामा बूढानिलकण्ठ नगरपालिका वार्ड नं १० बालुवाखानी, कपनमा अवस्थित फेरिल्याण्ड इन्टरनेशनल स्कूलका छात्रहरुले हुड्केली विधामा दोस्रो उपाधि हात पारेका विद्यालयका प्रिन्सिपल विष्णुचन्द्र अधिकारीले जानकारी दिनुभयो ।
प्रतियोगितामा प्रथम चरणमा करिब २०० विद्यालयहरुको सहभागिता रहेको थियो । डिजिटल राउण्ड पार गर्दै १३ विभिन्न विधामा जम्मा ३९ विद्यालय अन्तिम चरणमा पुग्न सफल भएका थिए ।
उक्त नृत्य प्रतियोगिता गोकर्णेश्वर नगरपालिका ५, नयाँ बस्तीमा रहेको टाइमलाइन स्कूलमा सञ्चालन गरिको थियो ।
कार्यक्रममा गोकर्णेश्वर नगरपालिकाका प्रमुख दिपक कुमार रिसालले प्रतियोगिताका विजेता विद्यालय र विद्यार्थीलाई ट्रफी तथा प्रमाणपत्र प्रदान गर्नुभयो ।
नृत्य निर्देशक संघ नेपाल काठमाडौं जिल्ला सचिव देवराज गुरुङको संयोजकत्वमा सम्पन्न कार्यक्रममा संघका केन्द्रीय अध्यक्ष भुवन श्रेष्ठ, वरिष्ठ उपाध्यक्ष प्रदिप मान श्रेष्ठ, सचिव ऋषि केश श्रेष्ठ, सहकोषाध्यक्ष केशव कोइराला लगायत उपस्थित हुनुहुन्थ्यो ।
विद्यालयस्तीय विभिन्न प्रतिस्पर्धामा उपाधि हासिल गर्दै आएको फेरिल्याण्ड स्कुलले विद्यालयका नृत्य प्रशिक्षक लक्ष्मी पुरी गुरुङको कोरियोग्राफीमा सो सफलता हासिल गरेको प्रिन्सिपल अधिकारीले बताउनुभयो ।
