श्यामलाल पोखरेल, बुटवल ।
राष्ट्रिय जनमोर्चाका अध्यक्ष चित्रबहादुर केसीले भारतले नेपालमाथि योजनाबद्ध रुपमा हस्तक्षेप गरिरहेको बताउनुभएको छ । नेपालको भूगोलमा मूल बाटो बनाएको उल्लेख गर्दै केसीले भारतले नेपालको कहिल्यै हित नचाहेको बताउनुभयो ।
अखिल नेपाल आदिवासी जनजाती सम्मेलन रुपन्देहीले शनिबार बुटवलमा आयोजना गरेको २८ औं विश्व आदिवासी दिवस कार्यक्रममा बोल्दै अध्यक्ष केसीले भारतले सधैँभर अस्थिर बनाएर नेपाललाई आफ्नो अनुकुलमा चलाउने योजना रहेको स्पष्ट पार्नुभयो ।
भारतीय जनतासँग कुनै गुनासो नभएको बताउँदै केसीले तर भारतीय शासकबाट नेपाल असुरक्षित रहेको बताउनुभयो । नेपाली भूमि भारतले अतिक्रमण गर्दा पनि राज्य बोल्न नसकेको उहाँको आरोप थियो ।
भारतलगायत विदेशी शक्तिहरुसँग सम्झौताहीन संघर्ष गर्नुपर्नेमा केसीले जोड दिनुभयो । उहाँले देशको अश्मिता जोगाउन देशभक्त शक्तिले कुरा बुझ्न जरुरी रहेको तर्क पनि गर्नुभयो ।
बहुदलीय व्यवस्था आएपछि युरोपियन युनियनले नेपालमा जातीय मुद्दा उठाएर जातजातीमा विभाजन ल्याएर जबरजस्त संघीयता घुसाइदिएको भन्दै अध्यक्ष केसी भन्नुभयो, ‘त्यसको विरोध सडकदेखि सदनसम्म राष्ट्रिय जनमोर्चाले मात्रै गरेको छ ।
पूर्व उपप्रधानमन्त्रीसमेत रहेका केसीले संघीयता, एमसीसी, एसपीपी, नागरिकता विधेयक, विभिन्न कालखण्डमा भएका असमान सन्धिसम्झौता खारेज नहुँदासम्म नेपाल स्वतन्त्र देश बन्न नसक्ने स्पष्ट पार्नुभयो ।
उहाँले भारतलगायत साम्राज्यवादी शक्तिहरुसँग झुके नेपाल संकटमा पर्ने बताउँदै विदेशी हस्तक्षेपसँग संघर्ष गर्नुको विकल्पै छैन भन्नुभयो ।
जातीय र क्षेत्रीय राजनीतिबाट नेपाललाई मुक्त गर्नुपर्नेमा उहाँको जोड थियो ।
नेपालमा आदिवासी जनजाति कोहो भनेर छुट्टाउनका लागि वैज्ञानिक ढंगले खोज अनुसन्धान गर्नुपर्ने पनि बताउनुभयो ।
कार्यक्रममा वामपन्थी नेता दुर्गानाथ खरेलले जातीय र क्षेत्री मुद्दा हावी हुँदा वर्गीय मुद्दाहरु ओझेलमा परेको बताउँदै कम्युनिष्टहरु वर्गीय मुद्दामा उभिनु पर्ने स्पष्ट पार्नुभयो ।
जातीय र क्षेत्रीय मुद्दाले समाजका जातजातीमा विभाजन ल्याउने भएकाले आदिवासी जनजाती आन्दोलनलाई वर्गीय मुद्दाका आधारमा अगाडि बढाउनु पर्नेमा जोड दिनुभयो ।
कम्युनिष्ट संग्रहालयका अध्यक्ष चेतनाथ आचार्यले नेपालमा रहेका सबै जातजातीका संस्कृति र संस्कारहरुलाई क्रान्तिकारी रुपान्तरण गर्न जरुरी रहेको बताउनुभयो । समाजको हरेक क्षेत्र, समूदाय र वर्गको उत्थानका लागि नयाँ जनवादी वयवस्था स्थापना हुनुपर्ने र त्यसका लागि वर्गीय मुक्तिको आन्दोलनलाई अगाडि बढाउनु पर्नेमा जोड दिनुभयो।
अखिल नेपाल आदिवासी जनजाती सम्मेलन रुपन्देही अध्यक्ष नारायण पुनको अध्यक्षता, हरि राहाडीको स्वागत र नगेन्द्रराज श्रीनेतको सञ्चालनमा कार्यक्रम भएको थियो ।
