काठमाडौं । निर्वाचन आयोगले प्रतिनिधि सभा र प्रदेश सभा सदस्यको पदावधि आगामी मंसिर २१ गतेसम्म रहने जनाएको छ ।
सरकारले मंसिर ४ गतेका लागि निर्वाचन घोषणा गरेको सन्दर्भमा मंसिर २१ सम्म सांसदहरुको पदावधि रहेने आयोगले स्पष्ट पारेको हो । पुनः दोहोरिनेको हकमा भने उम्मेदवारी दर्ता गरेको दिनसम्म मात्र पदावधि रहने आयोगले जनाएको छ ।
बिहीबार पत्रकार सम्मेलन आयोगले मंसिर २१ गतेसम्म पदावधि कायम रहने जनाएको हो ।
प्रमुख निर्वाचन आयाुक्त दिनेशकुमार थपलियाले पुनः उम्मेदवारी दिने सदस्यको हकमा उम्मेदवारी दिएपछि स्वतः पदावधि समाप्त हुने भएपनि अन्यको हकमा मंसिर २१ गतेसम्म पदावधि कायम रहनेछ भनि सरकारलाई दस्तावेज बुझाएको जानकारी दिनुभयो ।
उहाँले भन्नुभयो “प्रतिनिधि सभा र प्रदेश सभाको कार्यकालको व्याख्या वास्तवमा आयोगले गर्ने होइन । आयोगले आफ्नो सिफारिस पेस गर्दा संविधानमा भएको व्यवस्था र निर्वाचन सम्बन्धी कानूनमा भएको व्यवस्था अनुसार निर्वाचित मितिबाट पदावधि प्रारम्भ हुन्छ भन्ने व्यवस्था भएकाले त्यसैलाई टेकेर आउँदो मंसिरको २१ गते पदावधि समाप्त हुन्छ भनेर हामीले लिखित रुपमा नै पेस गरेका थियौँ । आयोग के ठान्दछ भने नेपाल सरकारले त्यो दस्तावेजलाई स्वीकार गरेको छ भन्ने ठान्दछ । त्यसकारण यसलाई अन्तराष्ट्रिय मूल्यमान्यता, संसदीय परम्परा, हाम्रो संविधान र कानूनी व्यवस्था कै पृष्टभूमिमा हेरिनुपर्ने हुन्छ । जहाँसम्म आयोगको धारणाको कुरा छ , आयोगले निर्वाचनमा सबै उम्मेदवारप्रति समान अवसर र समान खेल मैदानको सिद्धान्तलाई हामीले अवलम्बन गर्छौ । त्यसकारण प्रतिनिधिसभा र प्रदेशसभा सदस्यको पदमा उम्मेदवारी दिएपछि निजहरुको पद स्वतः सकिएको मानिनुपर्दछ भन्ने आयोगको स्पष्ट धारणा छ । यसलाई कानूनसम्मत ढंगले कहीँ न कहीँ व्याख्या गरेर हामी अघि बढाउँछौ ।”
आइतबारदेखि दल दर्ता, नौ लाख मतदाता थपिए,
आइतवारदेखि नै राजनीतिक दल दर्ता प्रक्रिया प्रारम्भ गरिने र आगामी सातादेखि समानुपातिक तर्फको निर्वाचन प्रक्रियाका कार्य अघि बढाउने तयारी आयोगले गरेको छ । त्यसैगरी असोजको तेस्रो हप्तामा उम्मेदवारी दर्ता गर्नेगरी निर्वाचन कार्यतालिका बनाउने तयारी भईरहेको पनि प्रमुख आयुक्त थपलियाले जानकारी दिनुभयो ।
आयोगले स्थानीय तहको निर्वाचनमा भन्दा प्रदेश र प्रतिनिधिसभाको निर्वाचनम बढीमा ९ लाख मतदाता संख्या थपिने अनुमान गरेको छ ।
