काठमाडौं । नेपाल कम्युनिस्ट पार्टी(मसाल) ले प्रतिनिधि सभाबाट पारित भएको नागरिकता विधेयक राष्ट्रघाती भएको ठहर गरेको छ ।
नेपालको भूराजनीतिक अवस्थाका कारण अत्यन्त कडा नागरिकता नीति अपनाउनुपर्नेमा विदेशीहरूप्रति खुकुलो नीति अपनाएर राष्ट्रघात गरिएको मसालको ठहर छ ।
मसालले खुकुलो नागरिकता नीतिका कारण नेपालीहरु नेपालमै अल्पमतमा पर्ने र नेपालले फिजीको नियती भोग्नुपर्ने अवस्था आएको बताएको छ ।
महामन्त्री मोहनविक्रम सिंहले आइतबार विज्ञप्ति प्रकाशित गरी राष्ट्रघाती नागरिकता विधेयक खारेज गर्न माग गर्नुभएको छ ।
सो विधेयकलाई खारेज गर्नको लागि आन्दोलनको उठान गर्न पनि आम जनतासित अपील गर्नुभएको छ ।
‘खास गरेर नेपालको स्थिति र नेपालको सिमा तीनतिरबाट भारततिर खुला भएको अवस्थामा हाम्रो देशको नागरिकता नीतिलाई अत्यन्त कडा पार्नुपर्ने आवश्यकता थियो। तर सरकारले त्यसलाई झन्झन् खुकुलो पार्दै लगिरहेको छ र त्यसबाट नेपालको राष्ट्रियता र सार्वभौमिकतामा समेत गम्भीर र दुर्गामी दुष्परिणामहरू हुनु अवश्वयमभावी छ’ मसालले भनेको छ, ‘यो पनि स्पष्ट छ कि नेपालको राष्ट्रिय हितमाथि ध्यान दिएर होइन, विदेशी दबाबमा नै नागरिकता सम्बन्धी नीतिलाई खुकुलो पार्ने काम गरिएको छ र सरकारले जसरी नागरिकता नीतिलाई खुकुलो पार्दै लगिरहेको छ, त्यसको परिणामस्वरूप निकट भविष्यमा नै नेपालीहरू स्वयम् आफ्नो देशमा नै अल्पसङ्ख्यकमा परिणत हुने खतरा बढेर गएको छ।’
