टेकराज भुसाल (टेकु), बुटवल ।
बुटवल उपमहानगरपालिकालाई सहयोगापेक्षी सडक मानवमुक्त घोषणा गरिएको छ । शनिबार एक कार्यक्रम गरी बुटवललार्ई रुपन्देहीकै पहिलो सडक मानवमुक्त नगर घोषणा गरिएको छ ।
बुटवल उपमहानगरपालिका, सामाजिक विकास मन्त्रालय, मानव सेवा आश्रम, जिल्ला प्रशासन कार्यालय र जिल्ला प्रहरी कार्यालय रुपन्देहीको संयुक्त प्रयासबाट सहयोगापेक्षी सडक मानवमुक्त नगर घोषणा गरिएको हो ।
सो कार्यक्रमको उद्घाटन मानवसेवा आश्रममा बस्दै आएकालाई माला र दोसल्लन लगाईदियर गरिएको थियो । मानव सेवा आश्रमका अध्यक्ष रामजी अधिकारीले घोषणा प्रतिवद्धता पत्र पढेर सुनाएका थिए भने बुटवल उपमहानगरका प्रमुख शिबराज सुबेदीले सहभागी सबैलाई सामूहिक प्रतिवद्धता गराएका थिए ।
अब बुटवलमा कोही पनि मानिस गास, बास र कपासका लागि भौतारिन नपर्ने र सडकमा रात बिताउन नपर्ने उनले बताए । घोषणा सभामा बोल्दै प्रदेश ५ का आन्तरिक मामिला तथा कानुनमन्त्री कुलप्रसाद केसीले सडकमा रहेका सहयोगापेक्षीहरुको व्यवस्थापनको दायित्व सरकारको रहेको बताए । उनले देश समृद्ध बन्नका लागि नेपाली सबै समृद्ध हुनुपर्ने बताए ।
कार्यक्रममा प्रदेश ५ का प्रदेशसभा सदस्य भोजप्रसाद श्रेष्ठ, फकरुद्धिन खांन, सहायक प्रमुख जिल्ला अधिकारी भरतकुमार शर्मा, जिल्ला समन्वय समितिका संयोजक एकराज बिक, उपमहानगरपालिकाका उपप्रमुख गोमादेबी आचार्य, मानव सेवा आश्रमका केन्द्रीय अध्यक्ष रामजी अधिकारी, आश्रमका प्रदेश ५ की प्रमुख रुपा केसी, लगायतले बोल्दै यो अभियानलाइ सबैले सहयोग गर्नुपर्ने बताएका थिए ।
कार्यक्रमअघि बुटवल बहुमुखी क्याम्पसबाट बाजागाजा सहितको र्याली निकालेर बुटवल उपमहानगर कार्यालयमा पुगि घोषणा सभामा परिणत भएको थियो ।
