काठमाडौं । संघीय संसदको हिउँदे अदिवेशन आज (शुक्रबार) देखि सुरु हुँदैछ। राष्ट्रपति विद्यादेवी भण्डारीको आह्वानमा संघीय संसदका दुवै सदन (प्रतिनिधिसभा र राष्ट्रियसभा) को पाँचौँ अधिवेशन आजबाट सुरु हुन लागेको हो ।
पहिलो बैठकमा राष्ट्रपतिको कार्यालयबाट प्राप्त पत्र सभाध्यक्षले पढेर सुनाइनेछ । यसबीचमा गरिएका मन्त्रिपरिषद् पुनर्गठनलगायत सरकारका महत्वपूर्ण कामबारेमा संसद्लाई जानकारी दिइनेछ ।
आजको बैठकको प्रमुख कार्यसूची प्रतिनिधि सभाको सभामुख चयन रहेको संसद सचिवालयले जनाएको छ । १४ असोजमा तत्कालीन सभामुख कृष्णबहादुर महराले राजीनामा दिएपछि सभामुख पद रिक्त छ ।
संसद सचिवालयकी महिला कर्मचारीमाथि बलात्कार प्रयास गरेको आरोपमा महरा हाल थुनामा छन् । उनको सांसद पदसमेत निलम्बनको अवस्थामा छ ।
को बन्ला नयाँ सभामुख ?
भागबन्डाका आधारमा पूर्वमाओवादीले प्रधानमन्त्री पदसँग सभामुख पद साटेको थियो । तर सभामुख महरा जेल पुगेपछि अब कसलाई सभामुख बनाउने भन्नेमा नेकपाभित्र एकमत छैन । नयाँ सभामुख पनि पूर्वमाओवादीबाट बनाउनु पर्ने पक्षमा केही नेताहरु अभिएका छन् भने पूर्व एमालेका नेताहरु प्रधानमन्त्रीलाई सजिलो हुनेगरी सभामुखको खोजि गर्नुपर्ने तर्क गरिरहेका छन् ।
पूर्व एमालेका नेताहरुले के पनि तर्क दिने गरेका छन् भने पार्टी एकता भइसकेपछि कुनै पूर्व समूहका आधारमा सभामुख छानिनु हुँदैन ।नेकपाभित्र सभामुखका लागि सुवास नेम्वाङ, अग्नि सापकोटा, देव गुरुङ, नेत्री पम्फा भूसाललगायतको नाममा छलफल चलिरहेको स्रोतले बताएको छ । प्रधानमन्त्री ओली सकेसम्म नेम्वाङलाई नै सभामुख बनाउने पक्षमा छन् ।
यता, बर्तमान उपसभामुख डा. शिवमाया तुम्वाहाम्फेले सभामुखका लागि आफ्नो दावेदारी पेश गरेकी छिन् । तुम्वाहाम्फेले उपसभामुख भइसकेको ब्यक्ति सभामुख हुन योग्य नै हुने बताउँदै आएकी छन् । सभामुख वा उपसभामुख मध्ये एक पद नेकपाले छोड्नुपर्ने परिस्थितिमा उपसभामुख तुम्बाहाम्फेले राजीनामा दिनुपर्नेछ । तर, उनले तत्कालिन सभामुख महराको गल्तीको सजाय आफूले किन पाउने भन्ने प्रश्न गर्दै आएकी छन् ।
