खिमराज चालिसे, चंडिगढ
भारतको हरियाणा राज्यको हिसारमा रेलवे ट्रयाकमा परेर एक नेपालीले ज्यान गुमाएका छन् । मृत्यु हुनेमा प्युठानका ५८ वर्षीय शंकर जिसी भन्ने टंक बहादुर जिसी रहेका छन् ।
मंगलबार विहान करिव ६ बजे बैंक कलोनी नजिकको रेलवे फाटक क्रस गर्ने क्रममा उनी रेलवे ट्रयाकमा परेका थिए ।
बैंक कलोनी हिसारमा बसोबास गर्दै मजदुरी गरेर जीवन निर्वाह गर्दै आइरहेका जिसी राजमो रुपन्देहीका नेता नारायण जिसीका सहोदर दाजु तथा प्रदेश सांसद तारा जिसीका जेठाजु हुन् । उनले बिहानै रेलवे फाटक क्रस गर्ने दौरानमा आइरहेको रेललाई नदेख्दा रेल ट्रयाकमा परि ज्यान गएको हो ।
सो घटना थाहा पाएपछि मूल प्रवाह अखिल भारत नेपाली एकता समाजका वैकल्पिक केन्द्रीय सदस्य तारा सोमरे, केन्द्रीय परिषद सदस्य केहर सिंह घर्ती मगर, परिषद सदस्य नारायण बिक, भूपूनगर अध्यक्ष नन्द बहादुर लम्तरी, नगर सदस्य नारायण न्यौपाने र लाल बहादुर चुदाली लगाएतको टिम तत्काल घटनास्थल पुगेको थियो ।
प्रशासनसँग मिलेर जाँच बुझ पश्चात रेलवे जीआरपी थानामा गएर आवश्यक कानुनी प्रकृया पुरा गरी मृतकका भाइ नारायण जिसीसँग सम्पर्क गरि शवको दाहसंस्कार गरिएको वैकल्पिक केन्द्रीय सदस्य तारा सोमरेले बताउनु भएको छ।
प्युठान जिल्लाको झिमरुक गाउँपालिका–७ तुषारा निवासी शंकरको दाहसंस्कारमा मूलप्रवाह अखिल भारत नेपाली एकता समाज र प्रवासी संघ भारतका कार्यकर्ताहरुको पनि उपस्थिति रहेको थियो।
