काठमाठौँ । अखिल नेपाल प्रगतिशील लेखक सङ्घ (अन्पा) को आयोजनामा बालकविता लेखन कार्यशाला सम्पन्न भएको छ ।
नेकपा (मसाल) का महामन्त्री मोहनविक्रम सिंहको उद्घाटन तथा नेपाल बालसाहित्य समाजका अध्यक्ष प्राध्यापक डाक्टर ध्रुवकुमार घिमिरेको प्रशिक्षणसँगै उक्त कार्यशाला सम्पन्न भएको हो ।
भर्चुअल माध्यमबाट २०७९ असार २६ गते आइतबार साँझ सम्पन्न उक्त कार्यक्रम प्राडा घिमिरेले विश्वभरिबाट जोडिनुभएका बालबालिकालाई बालोरी लयमा बालकविता लेख्न सिकाउनुभएको थियो ।
त्यस क्रममा उहाँले बालबालिकासित सुबोध शैलीमा वार्तालाप गर्नुभएको थियो । प्रशिक्षणबाट बालबालिकाहरू उत्साहित भएको स्थिति थियो ।
नेपालको शिक्षा विदेश पलायनयुक्त : सिंह
कार्यशालाको पूर्वाद्र्धमा उद्घाटन मन्तव्य राख्दै महामन्त्री मोहनविक्रम सिंहले नेपालको अहिलेको शिक्षा बालबालिकालाई विदेश पलायनमा प्रेरित गर्ने खालको भएको बताउनुभयो ।
‘प्रत्येक वर्ष हामीकहाँ हजारौँलाखौँ बालबालिका शिक्षित हुन्छन्’ उहाँले भन्नुभयो– ‘तर त्यससँगै जोडिएको अर्को सत्य यो हो, उनीहरूमध्ये धेरैजसो विदेश पलायन हुन्छन् ।’
उहाँले विकसित देशहरूले हाम्रो देशको शिक्षामा लगानी नगरिकन नै दक्ष जनशक्ति प्राप्त गरिरहेको बताउनुभयो ।
नेपाल प्राकृतिक हिसाबले सुन्दर देश भएको बताउँदै उहाँले राज्यको सही नीति र प्रयास हुने हो भने थोरै प्रयासबाटै सुन्दर र समृद्ध मुलुक निर्माण गर्न सकिने बताउनुभयो ।
‘हाम्रो देश सुन्दर छ; समृद्ध देश निर्माण गर्ने प्रशस्त आधार हामीकहाँ छन्’ उहाँले भन्नुभयो– ‘राज्यको सही नीति र प्रयास हुने हो भने केही वर्षमै हाम्रो देश संसारकै नमूना देश बन्न सक्छ ।
स्वदेशमा बसेकाहरूको पनि भ्रष्टाचरणले गर्दा देशको अपेक्षित विकास हुन नसकेको सन्दर्भ जोड्दै उहाँले बालबालिकालाई स्वदेशमै राम्रो भूमिका निर्वाह गर्न आग्रह गर्नुभयो ।
कार्यक्रम अन्पाका अध्यक्ष समीर सिंहको अध्यक्षता तथा उपाध्यक्ष गिरीप्रसाद बुढाको सञ्चालनमा अघि बढेको थियो । उपस्थित सहभागीलाई केन्द्रीय सचिवालय सदस्य खिमराज चालिसेले स्वागत गर्नुभएको थियो ।
