गोपाल प्रसाद भट्टराई
अर्घाखाँची । देशमा आमुल परिवर्तन भई सक्दा समेत शिक्षा क्षेत्र र विद्यार्थीका समस्या जस्ताको तस्तै रहनु दुःखद भएको अखिल (छैठौं)का नेताहरुले बताएका छन् । मुलुकमा दिन प्रतिदिन बलत्कार,लैङ्गिक हिंसा,चोरी जस्ता अपराधिक गतिबिधि हुनुमा बेरोजगारीले पनि साथ दिएको भन्दै उनिहरुले यसको निराकरणको निम्ती देशको बुर्जुवा शिक्षा प्रणालीलाई परिमार्जन गरि ब्यबहारिक र बैज्ञानिक शिक्षा लागु गर्नुपर्नेमा जोड दिएका छन् ।
यहि पुष ४ र ५ गते जिल्ला सदरमुकाम सन्धिखर्कमा हुन लागिरहेको अखिल (छैठौं)को २५ औं जिल्ला सम्मेलनको पूर्व सन्ध्यामा बुधबार विभिन्न विद्यालयमा सम्पन्न भएका प्रशिक्षण भेलालाई सम्बोधन गर्दै नेताहरुले यस्तो बताएका हुन् ।
अखिल (छैठौं)का जिल्ला अध्यक्ष सन्देश खनाल, उपाध्यक्ष पुरन नेपाली, सचिवालय सदस्य हिम्मत खनाल लगायतको सहजीकरणमा विभिन्न विद्यालय तथा क्याम्पसमा सम्पन्न भएका कार्यक्रममा अखिल (छैठौं)का केन्द्रीय उपाध्यक्ष देवेन्द्र कुंवर,महासचिव महेशराज जोशी र सचिव गोपाल प्रसाद भट्टराईले मन्तव्य राख्दै संघीयताको खारेजी नभए सम्म नयाँ संविधान पूर्ण कार्यान्वयन गर्न कठिन हुने र देशले समृद्धि हासिल गर्न नसक्ने समेत दाबी गर्नुभएको छ ।
अखिल (छैठौं) अर्घाखाँचीले आयोजना गरेको बिशेष भेलाले अर्घाखाँची शिक्षा क्याम्पस चुत्रोवसीमा माया खनालको अध्यक्षतामा २५ सदस्यीय मुल इकाइ समिति,जनज्योति मावि चुत्रोवसीमा नविन बन्जाडेको अध्यक्षतामा ३१ सदस्यीय मुल इकाइ समिति, जनप्रिय मावि असुरकोटमा कोपिला घर्तिको अध्यक्षतामा १५ सदस्यीय मुल इकाइ समितिको गठन गरेको जानकारी दिएको छ ।
यस्तै अर्घा रजस्थल मावि अर्घामा रिया थापाको अध्यक्षतामा ३५ सदस्यिय र शान्ति मा।वि।खिल्जीमा ललित सुनारको अध्यक्षतामा ११ सदस्यीय मुल इकाइ समितिको गठन गरेको (छैठौ)का जिल्ला अध्यक्ष सन्देश खनालले जानकारी दिनुभएको छ ।
