काठमाडौं । नेकपा एमालेले अर्थमन्त्री जनार्दन शर्मालाई संसदमा बोल्न नदिने तयारीमा गरेको छ ।
अर्थमन्त्री शर्माले बजेटमा करको दर बढाउन बाहिरी व्यक्ति संलग्न गराएको भन्दै एमालेले विरोध गर्दै आएको एमालेले प्रधानमन्त्रीको जवाफ र संसदीय छानबिन समिति बनाउन माग गरिरहेको छ ।
अर्थमन्त्री जनार्दन शर्माले आजै बजेटका बारेमा उठेका प्रश्नको प्रतिनिधिसभामा जवाफ दिने तयारी गरेका छन् । तर, एमालेले अर्थमन्त्रीलाई बोल्न नदिने जनाएको छ ।
अर्थमन्त्री शर्मामाथि बजेट घोषणाको अघिल्लो रात अनधिकृत व्यक्तिलाई प्रवेश गराएर करका दर हेरफेर गरेको आरोप लागेको छ ।
साथै अनधिकृत व्यक्ति प्रवेश गरेको प्रमाणका रूपमा रहेको सीसीटीभी फुटेज अर्थ मन्त्रालयका उच्च अधिकारीकै मिलेमतोमा ‘डिलिट’ गराइएको पनि उनीमाथि आरोप लागेको छ ।
जनार्दन अर्थमन्त्री छउन्जेल अर्थसचिव मरासिनी बिदामा
यता, अर्थसचिव मधुकुमार मरासिनी अनिश्चित समयका लागि बिदामा बसेका छन् । बजेट निर्माण र विभिन्न विषयमा अर्थमन्त्री जनार्दन शर्मा विवादमा मुछिएपछि सचिव मरासिनी बिदामा बसेका हुन् ।
बुधबार बिहान मरासिनीले प्रधानमन्त्री शेरबहादुर देउवा, अर्थमन्त्री जनार्दन शर्मा र मुख्यसचिव शंकरदास वैरागीलाई भेटेर बिदामा बस्ने जानकारी दिएको बालुवाटार स्रोतले बताएको छ ।
जनार्दन शर्मा मन्त्री रहुन्जेल आफू मन्त्रालय नफर्किने पनि प्रधानमन्त्री देउवालाई मरासिनीले जानकारी गराएको स्रोतको भनाइ छ ।
