काठमाडौं । नेकपा (माओवादी केन्द्र) का अध्यक्ष पुष्पकमल दाहाल प्रचण्डले छोरी गंगा दाहाल र ज्वाइँ जीवन आचार्यलाई केन्द्रीय समिति बैठकमा घुसाएर केन्द्रीय सदस्यको शपथ ग्रहण गराउनुभएको छ ।
करिब ६ महिना अघि भएको माओवादी केन्द्रको महाधिवेशनमा गंगा र जीवनको नाम केन्द्रीय सदस्यका रुपमा प्रस्ताव हुँदा चर्को विरोध भएपछि प्रचण्डले उनीहरुको नाम फिर्ता लिएको बताउनुभएको थियो । तर, आइतबारदेखि सुरु भएको केन्द्रीय समिति बैठकमा गंगा र जीवनलाई पनि राखेर शपथ ग्रहण गराइएको हो ।
प्रचण्डले छलछाम गरेर छोरी ज्वाइँलाई केन्द्रीय सदस्य बनाएको भन्दै माओवादी केन्द्रीय सदस्यहरु अचम्मित बनेका छन् । बैठकमा थाहै नदिइ उनीहरुलाई ल्याएर अरुसँगै शपथ गराइएको केन्द्रीय सदस्यहरुले बताएका छन् ।
एक केन्द्रीय सदस्यका अनुसार केन्द्रीय समितिको बैठक सुरु हुनासाथ प्रचलन अनुरुप शहीदहरुप्रति मौनधारण कार्यक्रम भयो। त्यसपछि केन्द्रीय कार्यालय सचिव श्रीराम ढकालले बैठकको सुरुवात अध्यक्ष प्रचण्डले गर्ने उद्घोष गरे। त्यसपछि प्रचण्डले ‘सबैभन्दा पहिले छुटपुट केन्द्रीय सदस्यहरुको शपथ ग्रहण हुने घोषणा गरी स्वयंसेवकहरुलाई मनोनित केन्द्रीय सदस्यहरुलाई शपथग्रहण पत्र दिन निर्देशन दिनुभयो ।
ती केन्द्रीय सदस्यले भने, ‘केन्द्रीय कमिटीमा को–को मनोनित भएका हुन्, त्यसबारे महाधिवेशनबाट निर्वाचित केन्द्रीय कमिटीलाई केही जानकारी दिइएन । सिधै शपथ पत्र थमाएर नाटकीय ढंगले शपथग्रहण गराइयो। को–को मनोनित भएका हुन्, शपथ ग्रहणअघि केही बताइएन ।’
केन्द्रीय समिति बैठक चलिरहँदा अन्य थपिएका केन्द्रीय सदस्यसँगै गंगा र जीवनले पनि शपथ ग्रहण गरेपछिमात्रै अन्य केन्द्रीय सदस्यहले उनीहरु पनि मनोनित भएको थाह पाए ।
‘सबैजना सरावरी उठेपछि को–को मनोनित भएका हुन् र उनीहरुले शपथ लिँदैछन् भन्ने जानकारी जानकारी हुने कुरा भएन’ ती केन्द्रीय सदस्यले भने, ‘छोरी–ज्वाइँलाई पनि केन्द्रीय सदस्य मनोनित गरिएको रहेछ। त्यसैले, यस्तो हद दर्जाको प्रपञ्च गरेर शपथग्रहण गराइयो ।’
आफ्ना भाइ नारायण दाहाललाई राष्ट्रिय सभामा मनोनित गर्न सिफारिस गरेको, छोरी रेनुलाई भरतपुर महानगरको मेयर बनाउन मरिहत्ते गरेको तथा हालै छोरा प्रकाशको शालिक अनावरण गरेको भनेर आलोचना भइरहँदा प्रचण्डले फेरि कपटपूर्ण तरिकाले छोरी ज्वाइँलाई केन्द्रीय सदस्य बनाएको भन्दै माओवादीमा चर्को असन्तुष्टि देखिएको छ ।
आइतबार प्रज्ञा भवन कमलादीमा सुरु बैठकमा अध्यक्ष प्रचण्डले १० पन्ने दस्तावेज पेश गर्नुभएको छ भने प्रचण्डको काउन्टरमा केन्द्रीय सदस्य प्रकाश विकल्पले २५ पृष्ठ लामो प्रतिवेदन पेश गर्नुभएको छ । प्रकाशको दस्तावेजमा माओवादी पार्टी स्खलित हुँदै गएको उल्लेख छ।
