काठमाडौं । सरकारले अमेरिकी सेनाको स्टेट पार्टनरसिप प्रोग्राम (एसपीपी) मा सहभागी नहुनेबारे अमेरिकालाई अझै पत्र लेखेको छैन ।
मन्त्रिपरिषदले एसीपीमा सहभागी नहुने निर्णय गरेपनि परराष्ट्र मन्त्रालयले अमेरिकालाई हालसम्म पत्र नलेखेको पाइएको हो ।
अमेरिकी सेनाको स्टेट पार्टनरसिप प्रोग्राम (एसपीपी) मा सहभागी नहुने मन्त्रालयमा आइतबार आयोजित पत्रकार सम्मेलनमा प्रवक्ता सेवा लम्सालले अमेरिकालाई पत्र पठाउने विषय अध्ययनकै क्रममा रहेको बताउनुभयो ।
‘अहिले हामी अध्ययनकै क्रममा छौँ। उपयुक्त समयमा अमेरिकालाई कूटनीतिक माध्यमबाट पत्र पठाइने आस्वस्त पार्न चाहन्छु’ लम्सालले भन्नुभयो ।
एसपीपीबारे विगतमा भएका निर्णयबारे परराष्ट्र मन्त्रालयको संलग्नता नभएको प्रवक्ता लम्सालको भनाई छ । नेपाली सेनाले परराष्ट्र मन्त्रालयलाई बाइपास गर्दै अमेरिकी सेनाको रणनीतिक कार्यक्रम एसपीपीमा सहभागी भएको खुलासा भएपछि सरकार पछि हटेको थियो ।
सरकारले गत असार ६ गते अमेरिकी एसपीपीमा सहभागी नहुने निर्णय गर्दै औपचारिक जानकारी दिन अमेरिकालाई पत्र पठाउन परराष्ट्र मन्त्रालयलाई म्यान्डेट दिएको थियो।
