कपिलवस्तु । कपिलवस्तुमा मोटरसाइकल दुर्घटनामा परि अखिल (छैठौं) की पूर्वजिल्ला सदस्य अस्मिता खनालको मृत्यु भएको छ ।
जिल्लाको शिवराज नगरपालिका–३ खरेन्द्रपुरमा सडकको किनारमा रोकिराखेको ट्याक्टरमा पश्चिमबाट पूर्वतर्फ जाँदै गरेको मोटरसाइकल ठोक्किँदा १९ वर्षीया अस्मिता खनालको मृत्यु भएको जिल्ला प्रहरी कार्यालय कपिलवस्तुले जनाएको छ ।
दुर्घटनामा मोटरसाइकल चालक शिवराज नगरपालिका ३ मदवा बस्ने वर्ष १८ का विमल पाण्डेको दुवै खुट्टामा चोट लागेको छ । उनको अवस्था सामान्य रहेको प्रहरीले जनाएको छ ।
मोटरसाईकल पछाडि सवार अखिल (छैठौं) कि पूर्वजिल्ला सदस्य शिवराज नगरपालिका–३ निवासी अस्मिता खनालको टाउकोमा चोट लागि गम्भीर घाइते भएकी थिइन् ।
खनालको उपचारको क्रममा बुधबार राति नै मृत्यु भएको प्रहरीले जनाएको छ । प्रहरीका अनुसार ट्याक्टर चालक र मोटरसाइकल प्रहरीको नियन्त्रणमा रहेको छ । घटनाबारे थप अनुसन्धान भैरहेको कपिलवस्तु प्रहरीले बताएको छ ।
खनाल करिब ३ वर्षसम्म अखिल (छैठौं) कपिलवस्तु जिल्ला सदस्य पदमा रहि संगठनमा विद्यार्थी आन्दोलनमा सक्रिय रुपमा काम गर्नुभएको थियो।
