धनगढी । डडेल्धुराको आलीताल गाउँपालिकाका एक कर्मचारीलाई बाँधेर कुटपिट गरी लुटपाट गर्ने तीन भारतीय पक्राउ परेका छन् ।
सोमबार कैलालीको गोदावरी नगरपालिका वडा नम्बर ५ बुढीतोलामा आलीताल गाउँपालिकाका कर्मचारी लोकेन्द्र सिंह भण्डारी बाँधिएको अवस्थामा फेला परेका थिए ।
उनका अनुसार घर कञ्चनपुरको बेदकोट नगरपालिका–३ दैजीबाट भण्डारी आफ्नै कारमा कार्यालय गइरहेका थिए । भण्डारीसँग लिफ्ट मागेर सँगै सवार ती भारतीयले ‘सेल्फी खिचौँ’ भनेर कारबाट बाहिर बोलाएर आक्रमण गरेको हो । भण्डारी हात, खुट्टा बाँधेको अवस्थामा भेटिएका थिए ।
आक्रमणबाट घाइते भएका उनलाई उपचारका लागि अत्तरियाको पदमा अस्पतालमा ल्याइएको छ । भण्डारी आलीताल गाउँपालिकामा कम्प्युटर अपरेटर पदमा कार्यरत छन्।
लुटपाट गर्ने तीनजना भारतीय नागरिकलाई प्रहरीले अत्तरियाबाट पक्राउ गरेको छ । पक्राउ पर्नेमा भारतको हरियाणाका २१ वर्षीय भगत सिंह, १७ वर्षीय साहिल बादलिसे र २० वर्षीय सन्नी जेट रहेको जिल्ला प्रहरी कार्यालय कैलालीका प्रहरी नायब उपरीक्षक वेदप्रकाश जोशीले जानकारी दिनुभयो ।
उनीहरूलाई गोदावरी नगरपालिका–१ स्थित ऐश्वर्य सामुदायिक वनबाट पक्राउ गरिएको हो । उनीहरुको साथबाट भण्डारीको प्रदेश ०३–०१–०२३ च ८७२१ नंको सुजुकी कार समेत बरामद भएको छ ।
भण्डारीलाई फोटो खिच्ने बहानामा सडकदेखि ५० मिटर तल लगी कुटपिट गरी आफूले प्रयोग गरेको गम्छाले हातखुट्टा र मुख बाँधी उनका साथमा रहेको एक थान मोबाइल, एक थान पर्स र कारसमेत लगी भारतीय नागरिक फरार भएका थिए ।
