काठमाडौं । संस्कृति पर्यटन तथा नागरिक उड्डयनमन्त्री प्रेम आलेलाई मन्त्रीबाट हटाउन माग गर्दै सर्वोच्च अदालतमा रिट परेको छ।
अधिवक्ता किशोरकुमार पौडेलले मन्त्री आलेको व्यवहार पटक पटक विवादमा परेको भन्दै पदमा बसिरहन योग्य नरहेको जिकिर सहित रिट दर्ता गर्नुभएको हो ।
यसअघि उक्त रिट सर्वोच्च प्रशासनले दरपीठ गरिदिएको थियो । त्यसविरुद्ध पौडेलले निवेदन दिएपछि बिहीबार सर्वोच्चले दरपीठ बेरितको देखिएको भन्दै बदर गरिदिएको थियो। रिटमाथि शुक्रबार सुनुवाइका लागि पेशी तोकिएको छ।
‘निज सो पदमा बसिरहन असक्षम रहेको प्रस्ट छ। निजको गैरजिम्मेवार अभिव्यक्तिले समाजलाई अपुरणीय क्षति पुगेको विषयमा यस सम्मानित अदालत जानकार छ। निज सो पदमा रहिरहँदा थप सिंगो समाज, देश, विदेशमा नकरात्मक प्रभाव पर्ने र थप क्षति पुग्ने भएकाले निजलाई मन्त्री पदमा आजकै मितिदेखि मुद्दाको अन्तिम किनारा नहुन्जेलसम्म काम नगर्नु, गर्न नदिनु भनि सर्वोच्च अदालत नियमावली, २०७४ को नियम ४९ बमोजिम विपक्षीको नाममा सुविधा सन्तुलनको रोहमा अन्तरिम आदेश जारी गरी पाउँ’, रिटमा उल्लेख छ।
पटक पटक विवादमा आउने मन्त्री आलेले पछिल्लो पटक नेपाल वायुसेवा निगमका अध्यक्ष युवराज अधिकारीलाई गाली गलौज गर्दै हातपात गरेपछि आलोचना भएको छ।
यसअघि मन्त्री आलेविरुद्ध संघीय संसद सचिवालयमा पनि उजुरी परेकाे छ ।
