मेघराज रिस्मेली, जापाल ।
जापानको टोकियो हिनो सिटीस्थित तामागावा नदीमा पौड़ी खेल्ने क्रममा डुबेर दुई नेपाली किशोरको ज्यान गएको छ ।
आइतबार पौड़ी खेल्ने क्रममा बागलुङको गलकोट नगरपालिका–६ चारौदी जामुनडाँडाका १३ वर्षीय क्रिस पाण्डे र गलकोट चारौँदीमा मामाघर भै बाँकेको कोहलपुर नगरपालिका–१२ का १४ वर्षीय देवेन पाण्डेको ज्यान गएको पारिवारिक स्रोतले जानकारी दिएको छ ।
नाताले मामा भान्जा पर्ने ती किशोर आइतबार बिदाको दिन पारेर बेलुका ४ बजेतिर पौड़ी खेल्न निस्केका र पौड़ी खेल्ने क्रममा खोलामा डुबेपछि उद्धार गर्दागर्दै एक जनाको घटनास्थलमा नै र अर्कों एकजनाको अस्पताल लैजाँदै गर्दा मृत्यु भएको महानगरीय प्रहरी विभागले जनाएको छ ।
तीन महिना अघिदेखि परिवारसँगै जापानमा रहेर अध्ययन सुरु गरेका क्रिस आफ़्नो बुवा खिम पाण्डे र दुई वर्ष अघिदेखि जापानमै अध्ययनरत देवेन बुवा दामोदर पाण्डे र आमा सरिता पाण्डेको साथमा टोकियोको ताचीगावा शहरमा बस्दै आएका थिए ।
उनीहरु दुई जनासँग अर्का ९ वर्षीय आफन्त बालक समेत सोही समयमा खोलामा सँगै खेल्न गएको भएपनि उनी सकुशल रहेको बताइएको छ ।
घटनास्थल नजिकै बस्ने ७० वर्षका एक व्यक्तिले भने ‘एक बालक नदीको किनाराबाट अचानक गहिरोतिर गए र उनलाई बचाउन खोज्दा अर्का बालक पनि डुब्न पुगे ।’
उनले थपे, ‘त्यसपछि उद्धारकर्तालाई खबर गरेपछि उनीहरू आएको एम्बुलेन्सको साइरन सुनेको थिएँ, त्यसैले नदीको किनारमा पुग्दा एउटा उद्धारकर्ता नदीमा पसेको देखेँ । त्यसपछि दुईजनाको उद्धार गरियो र अस्पतालतिर लगे ।’
नदीमा पानीको सतह उद्धारकर्ताको छाती नजिक रहेको थियो।
दुर्घटना भएको क्षेत्र तामा सिटी मोनोरेलको कोशुकाइदो स्टेशनको उत्तरपूर्वमा लगभग ७०० मिटरमा अवस्थित रहेको छ।
अर्का ताचिकावा शहरको नजिकै बस्ने एक ७३ वर्षीय मानिसका अनुसार डुबेको सूचना पाउना साथ लगभग १० दमकल र प्रहरी कारहरू भेला भएका थिए र धेरै गोताखोरहरू उद्धार कार्यमा संलग्न थिए ।
मृतक पाण्डेद्वयको जुन २३ तारिक बिहिबारका दिन बिहान १० बजे दाहसंस्कार गरिने भएको छ ।
