काठमाडौँ । काठमाडौं उपत्यकाको फोहोर फाल्ने नुवाकोटको सिसडोलमा अब रंगशाला निर्माण हुने भएको छ ।
काठमाडौं महानगरपालिकाका मेयर बालेन्द्र शाहले नुवाकोटको ल्यान्डफिल्ड साइट सिसडोलमा रंगशाला बनाउने योजना अघि सार्नुभएको हो ।
महानगरका क्लबबाट खेल्ने खेलाडी उत्पादन गर्नको लागि सम्बन्धित पक्षसँग सहकार्य गर्दै ग्रासरुट फुटबलका कार्यक्रम सञ्चालन गर्न मेयर शाहले छलफल अघि बढाएको शाहको सचिवालयले जनाएको छ ।
ग्रासरुट फुटबल र रंगशाला निर्माण गर्नेबारे बालेन्द्रले अखिल नेपाल फुटबल संघ (एन्फा) को निर्वाचनमा अध्यक्षका उम्मेदवार पंकजविक्रम नेम्वाङसँग छलफल गरेका छन्।
मेयर बालेन्द्रको भनाई उदृत गर्दैै सचिवालयले भनेको छ, ‘हामी सिसडोलको ल्यान्डफिल साइट जुन काठमाडौंभन्दा १२ किलोमिटर मात्र टाढा छ। अहिलेको फोहोरलाई उचित व्यवस्थापन गरेर सुन्दर रंगशाला तथा पार्क निर्माण गर्न चाहन्छौं।’
काठमाडौं महानगरपालिकाले आज (आइतबार) नीति तथा कार्यक्रम सार्वजनिक गर्दैछ ।
