धादिङ । धादिङमा मलामी बोकेको गाडी दुर्घटना हुँदा २६ जना घाइते भएका छन् । पाँच जनाको अवस्था गम्भीर रहेको प्रहरीले जनाएको छ।

सदरमुकाम धादिङबेसीबाट मलामी लिएर धादिङकै मैदी जाँदै गरेको बा ४ ख १२२९ नम्बरको स्वराज गाडी गएराति सडकमा पल्टिएर दुर्घटना भएको हो।

राति ११ बजे धादिङको नीलकण्ठ नगरपालिका ८ मैदी भज्याङमा सडकमै गाडी पल्टिएर दुर्घटना भएको प्रहरीले जनाएको छ।

दुर्घटनामा गम्भीर घाइते भएका ५ जनालाई स्थानीय स्वास्थ्य संस्थामा सामान्य उपचार गरी थप उपचारको लागि राति नै ट्रमा सेन्टर, काठमाडौं पठाइएको जिल्ला प्रहरी कार्यालय धादिङले जनाएको छ ।

बाँकी घाइतेको जिल्ला अस्पताल धादिङमा उपचार भइरहेको छ। केही उपचार पछि ठिक भएर घर फर्किएका छन्।

दुर्घटनापछि चालकलाई प्रहरीले पक्राउ गरेको छ।