प्रकाश थापामगर, काठमाडौँ ।।
राष्ट्रिय जनमोर्चाका नेता आनन्द शर्माले राष्ट्रियता, प्रतिगमन र सङ्घीयता नेपाली राजनीतिको तात्कालिक विषय भएको बताउनुभएको छ ।
२०७९ जेठ २८ गते काठमाडौँमा क्रियाशील नेकपा (मसाल) मोर्चा तथा जनवर्गीय सङ्गठनको संयुक्त भेलामा प्रमुख अतिथिको आसनबाट मन्तव्य राख्दै उहाँले यस्तो अभिव्यक्ति दिनुभएको हो ।
‘नेपालको राष्ट्रियतामा पहिलेदेखि नै समस्या थियो’ शर्माले भन्नुभयो– ‘पछिल्लो समयमा एम.सी.सी. जबर्जस्ती कृत्रिम बहुमतद्वारा संसद्बाट पारित गरिएपछि राष्ट्रियतामाथिको सङ्कट झनै बढेर गएको छ ।’
हालैका दिनमा अमेरिकाबाट भएका उच्च स्तरीय भ्रमणको सन्दर्भ उठाउँदै उहाँले भन्नुभयो– ‘तपाईंहरूले देखिरहनुभएको छ नि, यतिखेर अमेरिकी भ्रमण बाक्लिरहेको छ । यतिखेर त इन्डो–प्यासिफिक क्षेत्रका सैन्य अधिकारीको नै नेपाल भ्रमण भइरहेको छ ।’
उहाँले नेपालमा भारतीय साम्राज्यवादको पहिलेदखि नै माइक्रो म्यानेजमेन्ट चलिरहेकोमा अब अमेरिकी साम्राज्यवादको हस्तक्षेप बढेर जान थालेको बताउनुभयो ।
‘२०६२–६३ सालको जनआन्दोलनद्वारा प्राप्त उपलब्धि गणतन्त्र र धर्म निरपेक्षताले भारतीय प्रभाव कमजोर प¥यो† चीनको प्रभाव बढ्यो’ नेता शर्माले भन्नुभयो– ‘यही निष्कर्षका साथ भारतीय साम्राज्यवादले नेपालको राष्ट्रियताका साथै गणतन्त्र र धर्म निरपेक्षतामाथि समेत योजनाबद्ध षड्यन्त्र गरिरहेको छ ।’
आफ्नो प्रतिक्रियावादी स्वार्थ पूरा गर्न भारतले यतिखेर सबैभन्दा ठुलो राजनीतिक दल भनिएको एमाले, प्रतिगामी भूमिकामा रहेको राप्रपा र मधेसवादी लोसपालाई उपयोग गरिरहेको उहाँको तर्क थियो ।
एमालेको सन्दर्भमा उहाँले भन्नुभयो– ‘एमालेलाई हामीले मित्रशक्ति मानेका छौँ तर तात्कालिक राजनीतिमा उसले प्रतिगामी भूमिका खेलिरहेको छ ।’
उहाँले थप्नुभयो– ‘तर हामीले वर्गीय विश्लेषणमा नै एमालेलाई प्रतिगामी शक्ति बताएका होइनौँ ।’
अर्कोतर्फ उहाँले सङ्घीयताले नेपाली जनतालाई कर उपहार दिएको बताउनुभयो ।
‘कुखुरा, परेवा बेचे पनि कर, खोलेसाग बेचे पनि कर’ उहाँले भन्नुभयो– ‘नेपालमा सङ्घीयताले जनतालाई करको भार उपहारस्वरूप प्रदान गरेको छ । त्यसको बदलामा विकास निर्माणका काम शून्य छन् ।’
उहाँले सङ्घीयता खारेज गर्नैपर्ने बताउँदै त्यसको पक्षमा राष्ट्रिय जनमोर्चाले सञ्चालन गरेको आन्दोलनलाई अझ अगाडि बढाउनुपर्नेमा जोड दिनुभयो ।
उहाँले मोर्चा तथा जनवर्गीय सङ्गठनलाई आन्तरिक सङ्गठनात्मक गतिविधिमा मात्र सीमित नराखी जनतामाझ विस्तार गर्नुपर्ने आवश्यकता औल्याउनुभयो ।
राजमो काठमाडौँका अध्यक्ष झविन्द्र बेलबासेको अध्यक्षता तथा रमेश पौडेलको सञ्चालनमा अघि बढेको सो भेलामा अखिल नेपाल महिला सङ्घकी अध्यक्ष मीना पुन र अखिल नेपाल कानुन व्यवसायी सङ्घका अध्यक्ष अधिवक्ता पदम रोकाले सङ्क्षिप्त मन्तव्य राख्नुभएको थियो ।
कार्यक्रममा राजमोको तर्फबाट झबिन्द्र बेलबासे, अखिल नेपाल युवक सङ्घको तर्फबाट डम्मर कार्की, अखिल नेपाल ट्रेड युनियन महासङ्घ (अन्टुक) को तर्फबाट प्रेम मोक्तान, अखिल नेपाल महिला सङ्घको तर्फबाट ऋतु केसी, अखिल नेपाल किसान महासङ्घ (अप्फा) को तर्फबाट केबी घले, प्रगतिशील पत्रकार सङ्घको तर्फबाट रोशन दानी, रक्तिम सांस्कृतिक अभियानको तर्फबाट मधु क्षेत्री, अखिल नेपाल जनजाति सम्मेलन र अखिल (छैठौं) को तर्फबाट निमबहादुर बुढाथोकी, जातीय समता समाजको तर्फबाट भक्त विक, अखिल नेपाल शिक्षक सङ्घ र अखिल नेपाल बुद्धिजीवी सङ्घको तर्फबाट भोला ढकाल, अखिल नेपाल प्रगतिशील लेखक सङ्घको तर्फबाट समीर सिंह र अखिल नेपाल कानुन व्यवसायी सङ्घको तर्फबाट लक्ष्मणदेव पाण्डे र फ्लोरबाट लक्ष्मी केसीले रिपोर्टिङ गर्नुभएको थियो ।
सो अवसरमा अखिल नेपाल बुद्धिजीवी सङ्घका महासचिव भरतमणि भण्डारी, प्रगतिशील पत्रकार सङ्घका केन्द्रीय सदस्य प्रकाश थापामगर, राष्ट्रिय जनमोर्चाका केन्द्रीय सदस्य घनश्याम न्यौपाने, नेकपा (मसाल) काठमाडौँका प्रवक्ता जगत्प्रसाद रेग्मी र रक्तिम सांस्कृतिक अभियान काठमाडौँकी उपाध्यक्ष माया पुनको आतिथ्य रहेको थियो ।
भेलाले साउन महिनाभित्रमा राष्ट्रिय जनमोर्चा र अन्य जनवर्गीय सङ्गठनका जिल्ला समिति गठन, पुनर्गठन र बैठक तथा स्थानीय गतिविधि अगाडि बढाउने निर्णय भएको राजमो नेता रमेश पौडेलले बताउनुभयो ।
