बर्दिया । भारतले नेपालको कालापानीलगायतका क्षेत्र समेटर नयाँ नक्सा सार्वजनिक गरेको विरोधमा राष्ट्रिय जनमोर्चाले देशब्यापी प्रदर्शन जारी राखेको छ । सोही क्रममा बर्दियामा भएको विरोध प्रदर्शनमा जाली नक्सा खारेजीको मागसहित विरोध सभा सम्पन्न भएको छ ।
बर्दियाको बाँसगढी बजारमा शनिबार भएको विारेध प्रदर्शनलाई सम्बोधन गर्दै राजमो नेता एवं अखिल नेपाल सुकुम्बासी संघका अध्यक्ष तुलसीलाल सापकोटाले भारतले तुरुन्त जाली नक्सा सच्याउनु पर्ने बताउनुभयो । उहाँले त्यसका लागि सरकार र जनस्तरबाट अझै धेरै दबाब दिनुपर्ने आवश्यकता औंल्याउनुभयो ।
कार्यक्रमलाई राजमो जिल्ला अध्यक्ष युवराज ढकालले सम्बोधन गर्दै सीमा अतिक्रमण विरुद्ध राष्ट्रिय एकता कायम भएको र जनताले दबाब दिईरहँदासमेत सरकार चुप लागेर बसेको आरोप लगाउनुभयो । लोकबहादुर रानाले सञ्चालन गर्नुभएको कार्यक्रममा ज्ञानचन्द्र अर्याल, निर्मला अर्याललगायतका नेताहरुको आतिथ्यता रहेको थियो ।
