काठमाडौं । विश्व वातावरण दिवसको अवसरमा काठमाडौंका बूढानीलकण्ठ–१० बालुवाखानीस्थित फेरिल्याण्ड स्कुलले जनचेतनामूलक कार्यक्रम आयोजना गरेको छ ।
आइतबार वातावरण दिवसका अवसरमा फेरिल्याण्डका विद्यार्थीहरुले जनचेतनामुलक र्यालीको आयोजना गरे । त्यसक्रममा विद्यार्थीले पृथ्वी र प्रकृति बचाउन आह्वान गर्दै विभिन्न नाराहरु लगाएका थिए । विद्यार्थीहरुले आफैँले बनाएका चेतनामूलक प्लेकार्ड तथा चित्रसमेत प्रदर्शन गरे ।
कक्षा ४ देखि ७ सम्मका विद्यार्थीहरुले कपन क्षेत्र परिक्रमपछि विद्यालयमा पुगेर समूह छलफल गरेका थिए । त्यसक्रममा विद्यालयका निर्देशक विनोद अधिकारी, शिक्षकद्वय सुस्मा देवकोटा र लोकेन्द्र शाहीले वातावरण दिवसको महत्वबारे विद्यार्थीहरुलाई प्रशिक्षण दिनुभएको थियो ।
यस वर्ष विश्वमा ‘केबल एक पृथ्वी’ तथा नेपालमा ‘दिगो प्रकृतिमैत्री जीवनयापन : पृथ्वीको संरक्षण’ भन्ने राष्ट्रिय नाराका साथ विभिन्न कार्यक्रम आयोजना गरी विश्व वातावरण दिवस मनाइएको छ ।
संयुक्त राष्ट्रसङ्घीय वातावरण कार्यक्रमको आह्वानमा सन् १९७४ देखि हरेक वर्ष जुन ५ तारिखलाई विश्व वातावरण दिवसका रूपमा मनाइँदै आइरहेको छ ।
