काठमाडौं । भारतीय पक्षले कञ्चनपुरमा फेरि सिमा अतिक्रमण गरेको छ । भारतीय अर्धसैनिक बल (एसएसबी) ले दोधारा चाँदनीमा नेपाली भूमिमै तारबार गरेको छ भने बेलौरीमा नेपालीलाई आफ्नो जग्गा खनजोत गर्न रोक लगाएको छ ।
अन्तर्राष्ट्रिय सीमा सरोकार समूहका संयोजक पल्लवराज भट्टले दिनुभएको जानकारी अनुसार दोधारा चाँदनी नगरपालिका वडा नं ३ स्थित जमुनाघारीको जङ्गल क्षेत्रमा भारतीय पक्षले वृक्षरोपण गर्न ठेक्का दिएर एकतर्फी रुपमा सिमांकन गरी तारबार लगाउन सिमेन्टको खम्बा गाडेको छ ।
सीमा स्तम्भ न. १४ देखि १५ को बिचमा जङ्गल क्षेत्र भएकाले सिमांकन गरिएको छैन । १५ न. पिल्लर वडा न. ७ को कन्जभोजमा छ । १४ न. देखि झण्डै ७ सय मिटर बिचको जङ्गल क्षेत्रमा सीमा सर्भे टोलीको सहभागिता बिना भारतीय पक्षले एकतर्फी सिमान्कन गरि तारबार गर्ने तयारी गरेको हो ।
भारतीय सुरक्षाकर्मी (एसएसबी) ले स्ट्रीप नक्साको आधारमा एकतर्फी तारबार लगाउने प्रयास गरेको भट्टले बताउनुभयो । भारतीय पक्षले एकतर्फी तारबार गर्न लागेपछि स्थानीयले विरोध गरेका छन् ।
यता, एसएसबीले बेलौरी नगरपालिका–१० सडकघाट खैरेनी टोलमा पूर्ववडाअध्यक्ष होरीलाल चौधरीलाई आफ्नै जग्गा खनजोत गर्न रोक लगाएको छ ।
चौधरीको जग्गाधनी प्रमाण पुर्जा रहेको १३.५ कट्ठा जग्गा गुगल नक्सा अनुसार भारततिर परेको भन्दै खनजोतमा रोक लगाएको हो ।
भारतीय एसएसबीले कञ्चनपुरको ब्रम्हदेवदेखि बिचफाँटासम्म दर्जनौं स्थानमा सिमाअतिक्रमण गरेको छ भने नेपालीलाई आफ्नै जग्गा भोगचलन गर्न रोक लगाएको छ । केही महिनाअघि मात्रै एसएसबीले ब्रम्हदेवमा नेपालीले दशकौंदेखि भोगचलन गर्दै आएको स्थानमा पसल बनाउन रोक लगाएको थिया भने दक्षिणी क्षेत्र प्याराताल क्षेत्रमा अतिक्रमण गरेको थियो ।
- सीमा मिच्न दशगजामा राखिएको एसएसबीको पोष्ट नेपालीले हटाए
- कञ्चनपुरमा एसएसबीको अवरोधले किसानको उखु खेतमै सुक्न थाल्यो
