जनकपुरधाम । धनुषामा शुक्रबार राति भएको बम विस्फोटमा परी प्रहरी निरीक्षकसहित तीन जनाको मृत्यु भएको छ । विस्फोटमा इलाका प्रहरी कार्यालय (सखुवा, महेन्द्रनगर)का प्रहरी निरीक्षक अमिर दाहालको ज्यान गएको हो ।
घटनामा परी क्षिरेश्वरनाथ नगरपालिका ५ महेन्द्रनगरका स्थानीय ४६ वर्षका राजेश्वर साह र उनका छोरा अन्दाजी २४ वर्षका आनन्द साहको घटनास्थलमै मृत्यु भएको थियो ।
शुक्रबार मध्यराति भएको बम विस्फोटमा परी गम्भीर घाइते भएका इन्स्पेक्टर दाहालको उपचारका क्रममा बीपी कोइराला विज्ञान प्रतिष्ठान धरानमा शनिबार बिहान ७ बजे मृत्यु भएको प्रहरीले जनाएको छ ।
शुक्रबार राति इलाका प्रहरी कार्यालयभन्दा केही पर साहको घरमा शौचालयअगाडि राखिएको बम प्रहरी निरीक्षक दाहालसहितको टोली निरीक्षण गर्न पुगेका बेला विस्फोट भएको थियो ।
घटनामा प्रहरी जवान रिजन महतो, मृतक साहका अर्का छोरा प्रकाश र छोरी अञ्जली घाइते भएका छन् । घाइतेको बीपी प्रतिष्ठान धरानमा उपचार भइरहेको छ ।
साह मोटो रकम ऋण लगानी गर्ने साहु भएका कारण कसैले उनीहरुकाे हत्या गर्नकै लागि राखेकाे बम विस्फोट भएको हुन सक्ने स्थानीयको अनुमान छ। घटनाको विस्तृत विवरण आउन बाँकी छ। घटनाबारे प्रहरीले अनुसन्धान तीव्र पारेकाे छ।
