श्यामलाल पोखरेल, बुटवल ।
राष्ट्रिय जनमोर्चाका अध्यक्ष चित्रबहादुर केसीले भारतीय शासकले नेपालमा धर्मको राजनीति शुरु गरेको बताउनुभएको छ । नेपाललाई हिन्दु राज्य बनाउन र राजा ल्याउन भारतीय प्रधानमन्त्री नरेन्द्र मोदीले नेपालमा धर्मको राजनीति गरेको केसीले दावी गर्नुभयो ।
भारतले नेपालमाथि अन्याय गरेको उल्लेख गर्दै नेपालको सीमा मिचेर नेपालका प्राकृतिक श्रोत साधन भारतले कब्जा गर्न खोजेको केसीले बताउनुभयो । अखिल नेपाल शिक्षक संघको शनिबारदेखि बुटवलमा शुरु भएको चौथौ राष्ट्रिय महाधिवेशन उद्घाटन कार्यक्रममा बोल्दै अध्यक्ष केसीले भारतले सीमा मिच्दै गएपछि राष्ट्रियता संकटमा परेको बताउनुभयो ।
भारतीय जनता ठिक भएपनि भारतीय शासक वर्ग नेपालको हित नभएको अध्यक्ष केसीको भनाइ छ ।पूर्वउपप्रधानमन्त्रीसमेत रहनुभएका अध्यक्ष केसीले कांग्रेसलाई जिताउन र शेरबहादुरलाई प्रधानमन्त्री बनाउन गठबन्धन नभएको बताउँदै ओलीको प्रतिगमनका विरुद्ध पाँचदलीय गठबन्धन भएको बताउनुभयो । काठमाडौंमा बालेन शाहको जितले दलीय व्यवस्थालाई चुनौती दिएको र दलहरु असफल भएको भन्ने सन्देश दिएको बताउनुभयो ।
उहाँले संघीयता र एमसीसी खारेज गरी गणतन्त्र र संविधान जोगाउनु अहिलेको प्रमुख आवश्यत्ता हो भन््रनु भयो । ठूला दलहरुलाई अहिले संघीयता भालुको कञ्चट भएको बताउँदै केसीले प्रदेश खारेज गरेर प्रदेशमा हुने खर्चले देशमा उद्योग, कलकारखाना खोल्नुपर्नेमा जोड दिनुभयो ।
उहाँले शिक्षा र स्वास्थ्यको जिम्मा राज्यले लिनुपर्ने बताउनुभयो । अहिलेको शिक्षा प्रणाली असफल भएको बताउँदै यो शिक्षा प्रणाली गलत भएकै कारण नेपालको दक्ष जनशक्ति विदेश पलाएको भएको बताउनुभयो । सबै नीतिको गुरु राजनीति भएकाले विद्यार्थी र शिक्षकले राजनीतक गर्नुपर्ने बताउँदै शिक्षकहरुले विद्यार्थीलाई राजनीतिक सिकाउन आग्रह गर्नुभयो ।
राष्ट्रिय जनमोर्चाका कार्यकारी अध्यक्ष रश्मीराज नेपालीले विदेशीको हस्तक्षेपको चेपुवामा परेको नेपाल ओलीको प्रतिगमन र एमसीसीले झनै कमजोर भएको बताउनुभयो । उहाँले देशको राष्ट्रियता कमजोर भएका बेला विद्यार्थी र शिक्षकहरुले सही प्रकारको राजनीति बुझ्न आवश्यक रहेको बताउनुभयो ।
नेपालको भूमिलाई प्रयोग गरी चीन विरोधी गतिविधि सञ्चालन गर्नका लागि विकासको आश्वासन देखाएर अमेरिकाले एमसीसी ल्याएको बताउँदै यस विषयमा शिक्षकहरुले विद्यार्थीलाई सही प्रकारको राजनीति सिकाउनु पर्नेमा जोड दिनुभयो ।
पूर्व सांसदसमेत रहनुभएका नेता नेपालीले संघीयता र एमसीसीले संकटमा परेको देशलाई जोगाउनका लागि राष्ट्रवादी शक्ति एक हुने बेला आएको बताउँदै अब राष्ट्रबादी शक्ति र राष्ट्रविरोधी शक्ति चिन्ने बेला आएको छ भननुभयो ।
पूर्व सांसद तथा अखिल नेपाल शिक्षक संघका पूर्वअध्यक्ष हरि आचार्यले अहिलेको शिक्षा प्रणाली असफल भएको बताउनुभयो । उहाँले समयको माग अनुसार नयाँ शिक्षा नीति ल्याउनु पर्नेमा जोड दिनुभयो ।
कार्यक्रममा अखिल नेपाल राष्ट्रिय शिक्षक संगठनका केन्द्रीय अध्यक्ष घनश्याम पाठक, नेपाल राष्ट्रिय शिक्षक संगठनका लुम्बिनी प्रदेश उपाध्यक्ष जगन्नाथ मरासेनी, एकीकृत अखिल नेपाल शिक्षक संगठनका उपाध्यक्ष मानबहादुर पाण्डे, नेपाल शिक्षक महासंघका सह अध्यक्ष पूर्णप्रसाद दवाडी, अखिल नेपाल युवक संघका अध्यक्ष कृष्ण पाण्डे, अखिल नेपाल टे«ड युनियन महासंघका अध्यक्ष लोकराज भुसाल, जनजाती सम्मेलनका केन्द्रीय सदस्य उषा पुन, अखिल नेपाल महिला संघकी केन्द्रीय सदस्य सम्झना पौडेल, जातीय समता समाजका दिलप्रसाद नेपाली, मूल प्रवाह अखिल भारत नेपाली एकता समाजका अध्यक्ष ठाकुर खनाल, अखिल नेपाल बुद्विजीवी संघका दुर्गानाथ खरेल, अखिल नेपाल कानुन व्यवसायी संघका हिरालाल धामी, अखिल नेपाल उद्योग व्यापार संगठनका अध्यक्ष ढुण्डिराज पौडेल, अखिल नेपाल राष्ट्रिय स्वतन्त्र विद्यार्थी युनियन (छैठौं)का अध्यक्ष देवेन्द्र कुँवरलगायतले बोल्नुभएको थियो ।
अखिल नेपाल शिक्षक संघका अध्यक्ष सानोभाइ कार्कीको अध्यक्षता, तारा बेल्वासेको स्वागत र महासचिव चक्रपाणी पौडेलको सञ्चालनमा कार्यक्रम भएको थियो ।
तीन दिनसम्म चल्ने महाधिवेशनले नयाँ नेतृत्व चयन गर्ने छ ।
