धनगढी । सुदूरपश्चिममा क्रियाशील विभिन्न विद्यार्थी संगठनहरुले गेटा मेडिकल कलेज सञ्चालन गर्न माग गरेका छन् । अखिल (छैठौं) सहित ६ विद्यार्थी संगठनले शुक्रबार विज्ञप्ति प्रकाशित गरी कलेज सञ्चालनको माग गरेका हुन् ।

गेटा मेडिकल कलेज स्थापनाको लामो समय वितिसक्दासमेत सञ्चालनमा आउन सकेको छैन ।

हालै सरकारले आफ्नो नीति तथा कार्यक्रममार्फत प्रधानमन्त्रीको गृहजिल्ला डडेल्धुरामा मेडिकल कलेज स्थापना गर्ने घोषणा गरेपछि गेटा मेडिकल कलेज सञ्चालन नै नहुने हो कि भन्ने आशंका बढेको छ ।

कलेज सञ्चालनको प्रक्रिया यथाशीघ्र सुरु गर्न दबाब दिने उद्देश्यले कैलालीमा सङ्घर्ष समितिसमेत गठन गरिएको छ ।

विद्यार्थी संगठनहरुले प्रस्तावित गेटा मेडिकल कलेजप्रति राज्यले वेवास्ता गरेको र आगामी आर्थिक वर्षको नीति तथा कार्यक्रममा पनि यसबारे केही नसमेटेको भन्दै आपत्ति जनाएका छन् ।