बुटवल । अखिल नेपाल शिक्षक संघको चौथो महाधिवेशन यही जेठ १४ गतेदेखि बुटवलमा सुरु हुने भएको छ ।
‘नेपालको वर्तमान आवश्यकता ! सर्वशुलभ, प्राविधिक र गुणस्तरीय शिक्षाको सुनिश्चितता !’ भन्ने नाराका साथ तीन दिनसम्म चल्ने सम्मेलनले संघको नयाँ नेतृत्व चयन गर्नेछ ।
सम्मेलनको उद्घाटनका लागि राष्ट्रिय जनमोर्चाका अध्यक्ष चित्रबहादुर केसीलाई आमन्त्रण गरिएको संघका महासचिव चक्रपाणि पौडेलले जानकारी दिनुभयो । यस्तै, सम्मेलनमा शिक्षकहरुको छाता संगठन नेपाल शिक्षक महासंघ र महासंघमा आवद्ध विभिन्न १३ वटा संगठनहरुले शुभकामना दिने कार्यक्रम छ ।
सम्मेलनले वर्तमान शैक्षिक अवस्था तथा शिक्षकहरुको पेशागत हक हितबारे छलफल गर्नुका साथै संघको तेस्रो महाधिवेशनयताको चार वर्षे जानकारीमूलक प्रतिवेदन पारित गर्ने छ ।
अखिल नेपाल शिक्षक संघले महाधिवेशनका क्रममा मूलतः चारवटा विषयलाई उठान गर्ने महासचिव पौडेलले बताउनुभयो । उहाँले शिक्षामा २० प्रतिशत बजेट छुट्याउन माग गर्नुभयो ।
‘देशमा राजनीतिक परिवर्तन भयो, सामाजिक परिवर्तन भएन तर शैक्षिक परिवर्तन भएन । अहिले पनि शिक्षा ऐन २०२८ अनुसार नै नेपालको शिक्षा नीति सञ्चालित छ’ पौडेलले भन्नुभयो, ‘हामीले शिक्षामा परिवर्तन चाहेका छौँ । शिक्षा ऐन परिवर्तन गरेर आधुनिक र वैज्ञानिक शिक्षा दिनुपर्छ । ताकी शैक्षिक बेरोजगारीको समस्या समाधान होस् ।’
महासचिव पौडेलका अनुसार नेपाल शिक्षक महासंघले गएको २०७८ फागुन ९ गते सरकारलाई ५१ बुँदे मागपत्र बुझाएको थियो । सो को कार्यान्वयन गर्न संघले माग गरेको छ ।
यस्तै, २०७५ माघ १ गते तत्कालिन केपी ओली नेतृत्वको सरकारले गठन गरेको उच्चस्तरीय शिक्षा आयोगले बुझाएको प्रतिवेदन सार्वजनिक र कार्यान्वयन गर्न संघले माग गरेको छ ।
महासचिव पौडेल भन्नुहुन्छ, ‘त्यो प्रतिवेदनमा वर्तमान शिक्षाका समस्या र समाधानबारे विस्तृत अध्ययन गरिएको छ । प्रतिवेदन कार्यान्वयन भएमा मात्रै ५० प्रतिशत समस्या समाधान हुन्छ ।’
यस्तै, शिक्षक संघले सरकार आफैले मावि तहसम्म ६० हजार शिक्षकको दरबन्दी अपुग रहेको निष्कर्ष निकालेपनि त्यसलाई कार्यान्वयन नगरेको महासचिव पौडेलले बताउनुभयो ।
‘कक्षा ५ सम्म कक्षागत र त्यसभन्दा माथि विषयगत शिक्षकको दरबन्दी ६० हजार अपुग भएको कुरा सरकार आफैले स्वीकार गरेको छ’ पौडेलले भन्नुभयो, ‘त्यसलाई तत्काल पूर्ती गर्नुपर्छ ।’
