टेकराज भुसाल (टेकु), बुटवल ।
अखिल नेपाल राष्ट्रिय स्वतन्त्र विद्यार्थी युनियन (छैठौं) ले संघीयता विरुद्व काठमाडौ मार्च’को तयारी तिब्र पारेको छ । यसै क्रममा, शुक्रबार रुपन्देही, कपिलवस्तु र नवलपरासीको संयुक्त भेला बुटवलमा सम्पन्न भएको छ ।
अखिल (छैठौं)का अध्यक्ष विमल पोख्रेलको प्रमुख आतिथ्यतामा सम्पन्न भेलाले संघीयता विरुद्धको काठमाडौं केन्द्रित आन्दोलन व्यवस्थित र व्यापक बनाउन सामूहिक छलफल र जिल्लाबाट बढी भन्दा बढी विद्यार्थी सहभागिता गराउने निर्णय गरेको छ । यस्तै, तीनवटै जिल्लाहरुको विस्तारित बैठक बसाल्ने, संगठन निर्माण, आर्थिक अभियान लगायतका काम हरुलाई तिब्रता दिने जनाइएको छ ।
कार्यक्रममा अखिल (छैठौं)का महासचिव महेशराज जोशी, विश्व कम्युनिस्ट संग्रहालय नेपालका अध्यक्ष चेतनाथ आचार्य, राष्ट्रिय जनमोर्चा रुपन्देही जिल्ला सचिब टान बहादुर केसी, अखिल (छैठौं) ५ नम्बर प्रदेश अध्यक्ष सुरेश आचार्य, पाल्पा जिल्ला अध्यक्ष पुरन पोखरेल, अखिल नेपाल युवक संघका रुपन्देही जिल्ला कोषाध्यक्ष मिलन पोख्रेल, लगायतका नेताहरुको उपस्थित रहेको थियो ।
अखिल (छैठौं) केन्द्रीय सदस्य तथा रुपन्देही जिल्ला अध्यक्ष सरोजमान सिंहको अध्यक्षतामा सम्पन्न कार्यक्रमको सञ्चालन कपिलवस्तु जिल्ला अध्यक्ष रिशभ आचार्य र स्वागत नवलपरासी जिल्ला अध्यक्ष सगर सुवेदीले गर्नुभएको थियो ।
