काठमाडौं । दोलखाको भीमेश्वरमा स्काभेटर दुर्घटना हुँदा एक जनाको मृत्यु भएको छ भने तीन जना गम्भीर घाइते भएका छन् । दुर्घटनामा दोलखाकै बिगु गाउँपालिका ८ खोपचापुका अन्दाजी २३ वर्षीय राजु थामीको मृत्यु भएको प्रहरीले जनाएको छ ।
दुर्घटनामा अन्य तीन जना गम्भीर घाइते भएका छन् । प्रहरीका अनुसार स्काभेटर चालक दोलखाकै कालिञ्चोक गाउँपालिका ४ चिउरखीखर्कका २२ वर्षीय राजकुमार थामी, बिगु गाउँपालिका ७ अम्बा टोलका २७ वर्षीय विजय श्रेष्ठ र भीमेश्वर गाउँपालिका २ का १६ वर्षीय सुमन थामी गम्भीर घाइते भएका हुन् ।
स्थानीय प्राथमिक स्वास्थ्य केन्द्रमा उपचार हुन नसकेपछि तीनै घाइतेलाई काठमाडौं पठाइएको दोलखा प्रहरीले जानकारी दिएको छ। अहिले उनीहरूको उपचार ग्रान्डी र शिक्षण अस्पतालमा भइरहेको छ। दोलखा प्रहरीका अनुसार घाइते विजयको घुँडामुनिको भाग छिनेको छ।
दोलखा भीमेश्वर २ को गौतमटोलबाट दोलखा मन्दिर जाँदै गर्दा भीमेश्वर गाउँपालिका २ तिखातल भन्ने स्थानमा दुर्घटनामा परेको स्काभेटरको नम्बर प्लेट नै नरहेको प्रहरीले जनाएको छ ।
