काठमाडौं । स्थानीय तह निर्वाचनको सुरुवाती मत परिणाम आउन थालेको छ । शुक्रबार भएको मतदानपछि तत्काल मतगणना गर्न थालिएका कतिपय गाउँपालिका र वडाको मतपरिणाम सार्वजनिक भएका छन् ।
मनाङको चामे गाउँपालिका अध्यक्षमा एमालेका लोकेन्द्र घले निर्वाचित
मनाङको चामे गाउँपालिका अध्यक्षमा एमालेका लोकेन्द्र बहादुर घले दोस्रो पटक निर्वाचित भएका छन्।
६१० मत खसेको गाउँपालिकामा उनले ३२० मत प्राप्त गरे। निकटतम प्रतिद्वन्द्वी कांग्रेसका छिरिङ दोर्जे लामाले २७९ मत ल्याए।
उपाध्यक्षमा भने ३२५ मत ल्याउँदै कांग्रेसकी मिङमार डोमा लामा विजयी भएकी छन्।
वडा नम्बर २, ३ र ४ मा नेपाली कांग्रेसले जितेको छ । एमालेले वडा नम्बर १ निर्विरोध जितेको छ भने वडा नम्बर ५ मा गोलाप्रथाबाट वडाध्यक्ष जितेको छ ।
वडा नम्बर १ र २ मा क्रमशः एमाले र कांग्रेसबाट वडाध्यक्षहरु निर्विरोध निर्चाचित भएका थिए ।
०७४ को चुनाबमा पनि यो पालिकाको अध्यक्ष पद एमालेका घलेले नै जितेका थिए । उपाध्यक्ष पद काँग्रेसले नै जितेको थियो ।
नार्पाभूमि गाउँपालिकाअध्यक्षमा कांग्रेसका कोन्जो तेन्जिङ लामा विजयी
जनसंख्या भन्दा मतदाता धेरै भएको मनाङकै नार्पाभूमि गाउँपालिकाअध्यक्षमा नेपाली कांग्रेसका कोन्जो तेन्जिङ लामा विजयी भएका छन् ।
उनी १५८ मतसहित गाउँपालिकाको अध्यक्षमा विजयी भएका हुन्। उनका प्रतिद्वन्द्वी स्वतन्त्र उम्मेदवार कृष्ण लामाले १११ मत पाएका छन्।
खसेको ३०४ मतमध्ये ३५ मत बदर भएको छ।
उपाध्यक्षमा भने एमालेका फुन्चो लामा निर्विरोध निर्वाचित भइसकेका छन्।
यस पालिकाको जनसंख्या ३९८ छ भने मतदाता संख्या ४४८ छ ।
यस पालिकामा पुरुषभन्दा महिला मतदाता बढी छन् । पुरुष मतदाताको संख्या १९८ छ भने महिला मतदाताको संख्या २५० छ ।
जनगणना ‘अपडेट’ नभएका कारण जनसंख्या भन्दा मतदाता बढी देखिएको स्थानीय बताउँछन् ।
