काठमाडौं । प्रधानमन्त्री शेरबहादुर देउवाविरुद्ध निर्वाचन कार्यालयमा उजुरी परेको छ । चुनावी सभा सम्बोधनका लागि भरतपुर जान लागेका देउवाविरुद्ध बुधबार मुख्य निर्वाचन अधिकृतको कार्यालय चितवनमा उजुरी परेको हो ।
प्रधानमन्त्री देवाले आचारसंहिता उल्लंघन गरेर चुनाव प्रचारमा जान लागेको भन्दै अधिवक्ता सुनिता अधिकारीले मुख्य निर्वाचन अधिकृतको कार्यालयमा उजुरी दिनुभएको हो ।
निर्वाचन आचारसंहिताअनुसार निर्वाचनमा आफैँ उम्मेदवार भएका अवस्थामा बाहेक नेपाल सरकार, प्रदेश सरकारका मन्त्रीले कुनै राजनीतिक दल वा उम्मेदवारको पक्ष–विपक्षमा प्रचार प्रसार गर्न नपाइने व्यवस्था छ।
प्रधानमन्त्री देउवाले बिहीबार भरतपुरमा संयुक्त चुनावी सभामा सम्बोधन गर्ने कार्यक्रम छ । भरतपुर महानगरपालिकाको प्रमुख नेकपा माओवादी केन्द्रको भागमा परेपछि कांग्रेस कार्यकर्तामा असन्तुष्ट छन् ।
सत्तारुढ गठबन्धनले बिहीबार भरतपुरको हाकिम चोकमा संयुक्त चुनावी सभा आयोजना गर्दैछ । बिहान ११ बजेबाट सुरु हुने सभालाई प्रधानमन्त्री देउवासहित माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधवकुमार नेपालले सम्बोधन गर्ने बताइएको छ।
चितवनको पाँच दलीय लोकतान्त्रिक गठबन्धनले चुनावी सभालाई कांग्रेस महामन्त्री गगन थापा, नेता डा. शेखर कोइराला, जनता समाजवादी पार्टी (जसपा) र राष्ट्रिय जनमोर्चाका केन्द्रीय नेताहरुले पनि सम्बोधन गर्ने प्रचार गरिरहेको छ।
