राज कुमार रायमाझी, एलुरू (भारत) ।
मूल प्रवाह अखिल भारत नेपाली एकता समाजले पाल्पा जिल्लाका मिर्गौला पीडित एक युवकलाई उपचारका लागि आर्थिक सहयोग गरेको छ।
पाल्पाको रैनादेवी छहरा गाउँपालिका वार्ड नं ७ बल्ढेङ्ग्गढी बल्ढेङ्ग घर भइ हाल तानसेन नगरपालिका १ गैरागाउँ निवासी केहर सिंह रायमाझीका ३९ वर्षीय छोरा हरि बहादुर रायमाझी (सुमन) को दुवै मिर्गौला फेल भइ गौतमबुद्ध सामुदायिक मुटु हस्पिटल बुटवलमा उपचार भइरहेको छ ।
उपचार खर्च धेरै लाग्ने र उहाँको आर्थिक स्थिति अत्यन्त कमजोर रहेकोले आर्थिक सहयोगका लागि मूल प्रवाह नगर समिति एलुरुमा उहाँका आफन्तले आग्रह गरेका थिए ।
उहाँको पारिवारिक स्थितिबारे जाँचबुझ गरि मूल प्रवाह एलुरू नगर समितिका अध्यक्ष राजकुमार रायमाझी, उपाध्यक्ष लक्ष्मी जी.सी, सचिव शिवराज पौडेल, सहसचिव पितम बहादुर पुन, कोषाध्यक्ष कमला भट्टराई, नरेन्द्र बहादुर पुन, सदस्य रामप्रसाद पौडेल, तुलबहादुर रायमाझी, खुम बहादुर रायमाझी, शंकर खड्का, अशोक कुँवर, जित बहादुर कुँवरलगायत नगर समितिका सदस्यहरुको सकृयतामा सहयोग रकम सङ्कलन गरिएको थियो ।
पीडितलाई मिर्गौला प्रत्यारोपण गर्न सहयोग पुगोस् भन्ने उद्देश्यका साथ संकलित रकम एक लाख ६३ हजार १०५ रुपैयाँ पीडितलाई एक कार्यक्रमको आयोजना गरी हस्तान्तरण गरियो ।
रकम हस्तान्तरण कार्यक्रम नगर समितिका अध्यक्ष राज कुमार रायमाझीको अध्यक्षता, राजेन्द्र घर्तीको सञ्चालन तथा स्थानीय समाजसेवी हिरा भण्डारी, सम्झना चौधरी, रेस्मि कुमाल चौधरी, लिला बहादुर रायमाझीसमेतको उपस्थितीमा सम्पन्न भएको थियो ।
सो अवसरमा मूल प्रवाह नगर अध्यक्ष राज कुमार रायमाझीले पीडितको सीघ्र स्वास्थ्य लाभको कामना गर्नुभएको थियो भने पीडित हरि बहादुर रायमाझीले सहयोगी हातहरुप्रति आभार प्रकट गर्नुभयो ।
