पोखरा । पोखरास्थित नेपाली कांग्रेसका कार्यकर्ताहरुले आफ्नै पार्टी कार्यालय तोडफोड गरेका छन् । पोखराका विभिन्न वडाको नेतृत्व छाडेको भन्दै असन्तुष्ट बनेका कांग्रेस कार्यकर्ताहरुले पार्टीको प्रदेश कार्यालय तोडफोड गरेका हुन् ।
गठबन्धनको पत्रकार सम्मेलनमा नाराबाजी गरेका कार्यकर्ताहरु पत्रकार सम्मेलन सकिएलगत्तै प्रदेश कार्यालय पुगेर तोडफोड गरेका हुन्।तोडफोडबाट प्रदेश कार्यालयमा क्षति पुगेको छ ।
कास्की प्रहरीका प्रवक्ता सुन्दर तिवारीका अनुसार तोडफोडमा संलग्न २३ जनालाई पक्राउ गरिएको छ ।
माओवादी केन्द्रले पोखराका ३३ वटै वडामा कांग्रेसले एकलौटी उम्मेदवार उठाएको र आफूले भाग नपाएको भन्दै विरोध जनाएपछि गठबन्धनले माओवादीलाई पनि केही वडाको नेतृत्व दिने सहमति गर्न लागेको भन्दै कांग्रेस कार्यकर्ता विरोधमा उत्रिएका हुन्।
पोखरामा गठबन्धनको घोषणा पत्र सार्वजनिक
पोखरा महानगरपालिकामा पाँचदलीय गठबन्धनले चुनावी घोषणा पत्र सार्वजनिक गरेको छ। ‘समुन्नत पोखराको आधार, सबल अर्थतन्त्र र पूर्वाधार’ भन्ने नारासहित प्रमुखका उम्मेदवार धनराज आचार्यले घोषणा पत्र प्रस्तुत गर्नुभयो ।
उहाँले हिजोको पोखरा कस्तो थियो, पोखराको सामर्थ्य र समस्या के हो तथा यो कस्तो बनाउने भन्नेबारे तयारी साथ आएको दाबी गर्नुभयो ।
